4 мая, Мінск /Кар. БЕЛТА/. Напярэдадні 76-годдзя Перамогі савецкага народа ў Вялікай Айчыннай вайне БРСМ аб'яўляе аб пачатку рэспубліканскага патрыятычнага конкурсу "Мы памятаем", паведаміла карэспандэнту БЕЛТА афіцыйны прадстаўнік Цэнтральнага камітэта Беларускага рэспубліканскага саюза моладзі Наталля Сталпінская.
"Мы запрашаем моладзь прыняць удзел у новым творчым праекце ў чатырох намінацыях: "Вакал", "Мастацкае слова", "Сучасныя аўтары", "Трэнды TikTok". Праект накіраваны перш за ўсё на далучэнне падрастаючага пакалення да вывучэння гісторыі Вялікай Айчыннай вайны праз напрамкі культуры і мастацтва, а таксама падтрымку маладых таленавітых аўтараў і выканаўцаў. Кожная з намінацый прадугледжвае стварэнне відэаролікаў ваенна-патрыятычнай і гераічнай тэматыкі: пра Вялікую Айчынную вайну, мір, нашу краіну, - расказала Наталля Сталпінская. - Так, у намінацыі "Вакал" прапанавана падрыхтаваць відэаролікі з выкананнем кампазіцый, якія адпавядаюць заяўленай тэматыцы. Гэта можа быць сольны спеў або калектыўны. У намінацыі "Мастацкае слова" мы чакаем відэакантэнт з вершамі або ўрыўкамі з твораў. У намінацыі "Сучасныя аўтары" павінны прагучаць аўтарскія творы - музычныя кампазіцыі, вершы, проза".
Конкурс пройдзе з 5 мая па 15 чэрвеня ў два этапы: адборачны тур і анлайн-галасаванне. Заяўкі ад удзельнікаў прымаюцца да 8 чэрвеня. Першы адборачны тур адбудзецца з 9 па 11 чэрвеня. Аргкамітэт вызначыць па 10 лепшых работ у кожнай намінацыі.
"З 11 да 15 чэрвеня ў цэнтральных афіцыйных пабліках БРСМ пройдзе анлайн-галасаванне, падчас якога пераможцаў вызначаць інтэрнэт-карыстальнікі. У намінацыі "Трэнды TikTok" пераможца будзе вядомы ўжо ў першым туры. Для ўдзелу ў ёй у аргкамітэт неабходна прадаставіць відэаролік, які будзе апублікаваны з 5 мая па 8 чэрвеня ў сэрвісе TikTok (з пазначэннем хэштэгаў #мыпомним, #БеларусьПомнит, #Беларусь) і будзе папулярызаваць подзвіг беларускага народа ў Вялікай Айчыннай вайне", - дадала прадстаўнік ЦК БРСМ.
Творчы конкурс "Мы памятаем" стане састаўной часткай шматступеньчатага рэспубліканскага праекта БРСМ "Кветкі Вялікай Перамогі". У сувязі з гэтым важнай умовай з'яўляецца наяўнасць ва ўдзельнікаў конкурсу сімвала праекта - чырвона-зялёнай стужкі з яблыневым цветам. Пераможцы конкурсу будуць запрошаны для ўдзелу ў маштабнай рэспубліканскай патрыятычнай акцыі 22 чэрвеня.-0-