21 студзеня, Мінск /Кар. БЕЛТА/. Больш за 3,5 тыс. помнікаў ваеннай гісторыі занеслі школьнікі на інтэрактыўныя карты сваіх рэгіёнаў, паведаміла ў час круглага стала ў прэс-цэнтры БЕЛТА кансультант упраўлення сацыяльнай, выхаваўчай і ідэалагічнай работы Міністэрства адукацыі Ларыса Емяльянчык.
"Вялікая ўвага ва ўстановах адукацыі ўдзяляецца арганізацыі пошукава-даследчай работы па ўвекавечанні памяці загінулых абаронцаў Айчыны і ахвяр вайны, правядзенню разведвальных пошукавых экспедыцый, вахт памяці. Пошукава-даследчая дзейнасць ва ўстановах адукацыі вядзецца праз навуковыя таварыствы навучэнцаў, пошукавыя клубы, атрады і групы "Следапыт", "Юны патрыёт", "Нашчадкі перамогі", "Пошук", - расказала Ларыса Емяльянчык. - Пошукавыя групы ўстаноў адукацыі даследавалі помнікі ваеннай гісторыі ў сваіх рэгіёнах (мемарыяльныя комплексы, абеліскі, брацкія магілы, памятныя знакі). Вынікам гэтай работы стала стварэнне інтэрактыўных карт, якія даюць магчымасць устанавіць месцазнаходжанне помніка, яго апісанне з пазначэннем колькасці і спісу пахаваных. Цяпер навучэнцы стварылі больш за 140 інтэрактыўных карт па тэрыторыях сельскіх саветаў, раёнаў і абласцей, у якіх прадстаўлена апісанне больш за 3,5 тыс. помнікаў ваеннай гісторыі".
Паводле слоў Ларысы Емяльянчык, пільная ўвага ўдзяляецца арганізацыі работы музеяў ва ўстановах адукацыі. "На сённяшні дзень функцыянуе 1477 музеяў, з іх 226 ваенна-гістарычнага профілю. Практычна ва ўсіх музеях устаноў адукацыі ёсць экспазіцыі, якія адлюстроўваюць падзеі перыяду Вялікай Айчыннай вайны. Пастаянная работа, накіраваная на наданне гістарычнаму матэрыялу асобасна значнага характару, дае магчымасць узбагаціць унутраны свет вучняў. Зрабіць атрыманы матэрыял больш цікавым для дзяцей даюць магчымасць правядзенне ў музеях урокаў мужнасці, лекцый, міні-спектакляў, урачыстых мерапрыемстваў у абстаноўцы прадстаўленай гістарычнай эпохі", - адзначыла кансультант упраўлення.
З прыцягненнем навучэнцаў установы адукацыі правялі акцыі па добраўпарадкаванні і навядзенні парадку ў месцах размяшчэння мемарыяльных комплексаў, абеліскаў, помнікаў, брацкіх і індывідуальных магіл загінулых у гады ВАВ. "Ва ўсіх установах адукацыі арганізавана шэфства над удзельнікамі Вялікай Айчыннай вайны, працаўнікамі тылу і сем'ямі загінулых ваеннаслужачых, ветэранамі працы, пажылымі людзьмі. Цімураўскія і валанцёрскія атрады аказваюць адрасную дапамогу ва ўборцы сельскіх падворкаў, дамоў, апрацоўцы прысядзібных участкаў. У час пошукавай і даследчай работы ўстановы адукацыі абнаўляюць банк даных аб ветэранах Вялікай Айчыннай вайны, ствараюць і папаўняюць зборнікі ўспамінаў ветэранаў і іх блізкіх", - падкрэсліла Ларыса Емяльянчык.
Шырокія магчымасці ў выхаванні грамадзянскасці і патрыятызму ў вучняў дае арганізацыя работы па турызме і краязнаўстве. На працягу года ўстановы адукацыі арганізоўвалі тэматычныя экскурсіі (Брэсцкая крэпасць, Беларускі дзяржаўны музей гісторыі Вялікай Айчыннай вайны, мемарыяльны комплекс "Хатынь", мемарыяльны комплекс" Буйніцкае поле"), паходы, пошукавыя экспедыцыі, велапрабегі па месцах воінскай славы. У 2019 годзе каля 350 тыс. навучэнцаў прынялі ўдзел у адукацыйных экскурсіях і паходах па Беларусі і за яе межамі. Ужо стала традыцыйным штогадовае правядзенне Беларускім дзяржаўным педагагічным універсітэтам імя Максіма Танка "Зорных паходаў".
У Беларусі створана і ўдасканальваецца цэласная сістэма грамадзянскага і патрыятычнага выхавання ва ўстановах адукацыі ўсіх узроўняў", - рэзюмавала кансультант упраўлення.-0-
