Больш за 200 студэнтаў з 47 ВНУ. У Мінску праходзіць Беларуска-кітайскі маладзёжны форум

24 чэрвеня, Мінск /Кар. БЕЛТА/. У Мінску праходзіць Беларуска-кітайскі маладзёжны форум. Урачыстая цырымонія адкрыцця прайшла ў Нацыянальным дзіцячым тэхнапарку, перадае карэспандэнт БЕЛТА.
Форум быў ініцыяваны ў чэрвені 2024 года Прэзідэнтам Беларусі Аляксандрам Лукашэнкам у час яго сустрэчы з экс-сакратаром партыйнага камітэта Пекінскага ўніверсітэта Хаа Пінам.

"Роўна год таму ў гэты ж час прайшоў форум рэктараў нашай краіны і Кітая, арганізатарам якога былі Беларускі дзяржаўны ўніверсітэт і Пекінскі ўніверсітэт (ПКУ), - адзначыў рэктар БДУ Андрэй Кароль - У мерапрыемстве ўдзельнічалі больш за 40 універсітэтаў. Там былі прыняты многія важныя рашэнні, у прыватнасці, заснаваны Дні дружбы і адзінства паміж БДУ і ПКУ. Таксама адбылася памятная сустрэча з кіраўнікамі кітайскіх і беларускіх універсітэтаў, дзе кіраўніком дзяржавы было прапанавана правесці менавіта маладзёжны форум паміж нашымі краінамі. Цэлы год ішла падрыхтоўка да яго, і сёння мы маем магчымасць напоўніць Дні дружбы і адзінства БДУ і ПКУ вось такім даволі сур'ёзным, глыбокім і паспяховым мерапрыемствам".

У маладзёжным форуме прымаюць удзел каля 36 беларускіх ВНУ, 11 вядучых універсітэтаў Кітая, а таксама больш за 200 таленавітых студэнтаў, якія праявілі сябе ў навуцы, у творчай дзейнасці або ў спорце.

"Нас чакае даволі насычанае мерапрыемства, будзе і нешта незвычайнае, напрыклад, мы правядзём незвычайную пару, дзе студэнты самастойна прыдумаюць лагатып "Моста дружбы паміж Беларуссю і Кітаем". У час мерапрыемства пройдзе круглы стол, прысвечаны абмеркаванню перспектыў студэнцкай навукі і ўмацаванню навуковага патэнцыялу паміж нашымі краінамі. У кітайскіх нарматыўна-прававых дакументах аб адукацыі прапісана, што менавіта выхаванне маральнай асобы з'яўляецца для іх прыярытэтам. Гэтыя акцэнты ёсць і ў нас. Тут мы гаворым не толькі пра захаванасць гістарычнай памяці, што вельмі важна для таго, каб разумець, хто мы, і на аснове сваёй ідэнтычнасці будаваць далейшую нашу будучыню, але і ў цэлым - мы маем уяўленне пра ўсе адвечныя каштоўнасці, якія спрадвеку былі ў чалавецтва. Таму я думаю, што вось менавіта ў гэтых напрамках стваральнай працы мы рухаемся, таму што каштоўнасці ў стварэнні, а не ў разбурэнні. Гэта датычыцца як навукі, так і адукацыі, але падспудна галоўны лейтматыў - гэта фарміраванне сталай патрыятычнай асобы, якая не баіцца згубіцца ў патоку інфармацыі, у розных тэхналогіях маніпулявання свядомасцю людзей, якія сёння як паветра, як вецер вакол нас", - падкрэсліў кіраўнік Белдзяржуніверсітэта.

Паводле яго слоў, для БДУ кітайскія ВНУ - гэта ключавыя стратэгічныя партнёры. "У нас функцыянуе каля 600 пагадненняў, з іх 20 працэнтаў - гэта пагадненні з кітайскімі ўніверсітэтамі. Ва ўніверсітэце навучаюцца каля 4 тыс. кітайскіх студэнтаў з 5,5 тыс. замежных студэнтаў (гэта больш за 75 працэнтаў). У супрацоўніцтве з універсітэтамі Кітая мы паводзім сябе вельмі выбарачна, выкарыстоўваючы моцныя бакі таго ці іншага універсітэта, спалучаючы іх з моцнымі бакамі нашай ВНУ", - дадаў Андрэй Кароль.

Беларускі бок на форуме прадстаўляюць БДУ, МДЛУ, БДЭУ, БДМУ, БРУ, ГДУ імя Ф.Скарыны, ВДУ імя П.М.Машэрава, БрДУ імя А.С.Пушкіна. Кітайскі - 11 ВНУ: Пекінскі ўніверсітэт, Харбінскі політэхнічны ўніверсітэт, Пекінскі педагагічны ўніверсітэт, Універсітэт імя Сунь Ятсена, Паўднёва-Усходні ўніверсітэт і іншыя. Удзельнікі форуму ўсклалі кветкі да стэлы "Мінск - горад-герой". Прадоўжыцца мерапрыемства работай круглых сталоў, дыялогавых пляцовак і інтэрактыўных семінараў. Цэнтральнай падзеяй форуму заяўлены эўрыстычны занятак "Масты перспектыў". Правядзе яго для беларускіх і кітайскіх студэнтаў рэктар БДУ. Таксама адбудзецца таварыская гульня па баскетболе паміж жаночымі студэнцкімі зборнымі БДУ і ПКУ.-0-