16 чэрвеня, Мінск /Кар. БЕЛТА/. На прадпрыемствах "Беллегпрама" ў гэтым годзе плануюць працаўладкаваць больш за 200 юнакоў і дзяўчат са студэнцкіх атрадаў, паведаміла карэспандэнту БЕЛТА прэс-сакратар канцэрна Марына Васькевіч.
"На прадпрыемствах канцэрна ў гэтым годзе плануем працаўладкаваць больш за 200 маладых людзей. Юнакі і дзяўчаты будуць працаваць непасрэдна на вытворчасці, а таксама на сацыяльных аб'ектах арганізацый - у аздараўленчых лагерах, пунктах грамадскага харчавання", - расказала прэс-сакратар.
Паводле яе слоў, прадстаўнікі адразу двух вытворчых атрадаў - "Модны стыль" і "ШыК" - з ліку навучэнцаў Мінскага дзяржаўнага прафесійна-тэхнічнага каледжа швейнай вытворчасці пачалі ўжо работу ў сталіцы. Яны працуюць на вытворчасці скургалантарэйных вырабаў у ААТ "Галантэя" і галаўных убораў у ЗАТ "Фабрыка галаўных убораў "Людміла". "У вольны час студатрадаўцы дзеляцца адзін з адным уражаннямі аб рабоце, першых пробах у прафесійнай дзейнасці, а таксама распрацоўваюць і праводзяць забаўляльныя атрадныя мерапрыемствы", - дадала Марына Васькевіч.
У канцэрн "Беллегпрам" уваходзяць 73 арганізацыі, 59 з якіх прамысловыя. Прампрадпрыемствы дзеляцца па галінах: тэкстыльная, швейная, трыкатажная і гарбарна-абутковая. Прадукцыя пастаўляецца больш як у 50 краін.-0-
