18 мая, Мінск /Кар. БЕЛТА/. Больш за 100 хворых на COVID-19 сталі рэцыпіентамі донарскай плазмы. Прыкладна ў палавіны з іх назіраецца станоўчая дынаміка пасля ўкаранення такога метаду лячэння, паведаміў у эфіры тэлеканала СТБ дырэктар РНПЦ трансфузіялогіі і медыцынскіх біятэхналогій Фёдар Карпенка.
"Тактыка лячэння змянілася ад таго, што мы першапачаткова планавалі, і таго, што бачылі ў міжнародных публікацыях. Цяпер мы гаворым аб якасці плазмы, гэта значыць, бачым тытры антыцелаў і адбіраем найбольш моцную плазму. Сёння ў нас сфарміравана па цэнтры база ўсіх тых рэцыпіентаў, пацыентаў, каму была выкарыстана плазма", - сказаў Фёдар Карпенка.
Паводле слоў кіраўніка РНПЦ, у 50 пацыентаў назіраецца станоўчая дынаміка, у іх ліку і тыя, хто выздаравеў. Донарскую плазму часцей імкнуцца выкарыстоўваць для больш цяжкіх пацыентаў. Іх сваякі павінны мець на ўвазе, што рашэнне аб неабходнасці пералівання прымае ўрач, таму ў некаторых выпадках ім варта адмовіцца ад ідэі пошуку донара праз сацыяльныя сеткі, асабліва за асобныя матэрыяльныя ўзнагароды. "Хочацца звярнуцца да сваякоў: не трэба публікаваць, што нейкія грашовыя дадатковыя выплаты, любыя грошы мы дадзім донарам. Паверце, уся плазма, усё, што нарыхтоўваецца, адразу аддаецца нашым пацыентам. І ні адзін донар не адмовіў нам з-за грошай, не сказаў: я не прыйду, паколькі плаціцца мала грошай, мала льгот, гарантый і кампенсацый", - звярнуў увагу Фёдар Карпенка.
Першую данацыю плазмы правялі ў Беларусі 11 красавіка. На сённяшні дзень у Беларусі больш за 120 чалавек сталі донарамі плазмы, пры гэтым было зарэгістравана больш за 200 жадаючых запісацца на пераліванне. Аднак не ўсе падышлі з-за проціпаказанняў або адсутнасці антыцелаў у арганізме.
Каб здаць плазму, донар павінен прайсці паглыблены медыцынскі агляд. Сама працэдура пералівання доўжыцца ад 30 да 50 хвілін. 99 працэнтаў донараў пераносяць забор плазмы без якіх-небудзь пабочных эфектаў.-0-
