16 снежня, Мінск /Кар. БЕЛТА/. Больш як 63 працэнты беларусаў плануюць прыняць удзел у рэферэндуме па змяненні Канстытуцыі. Такія даныя сацыялагічнага даследавання "Беларусь: меркаванне пра будучыню", арганізаванага Інстытутам сацыялогіі Нацыянальнай акадэміі навук Беларусі, агучыў журналістам кіраўнік Аналітычнага цэнтра EcooM Сяргей Мусіенка, перадае карэспандэнт БЕЛТА.
У рэферэндуме па змяненні Канстытуцыі плануюць прыняць удзел больш як 63 працэнты рэспандэнтаў. Пры гэтым падтрымка рашэнняў аб абнаўленні Канстытуцыі і правядзенні рэферэндуму найбольш высокая сярод грамадзян ад 56 гадоў і старэйшых, якія жадаюць дабрабыту сваім дзецям і ўнукам у паспяховай і моцнай краіне.
Рэспандэнты праяўляюць высокую зацікаўленасць і актыўнасць у абмеркаванні шляхоў сумеснага вырашэння хвалюючых іх праблем. Перажываючы за сучаснасць, грамадства накіравана ў будучыню, звязвае далейшае развіццё з абнаўленнем палітычнай сістэмы краіны, умацаваннем дзяржавы, павышэннем эфектыўнасці дзейнасці дзяржаўных і грамадскіх інстытутаў.
Даследаванне паказала, што беларускае грамадства неабыякавае. У фокусе ўвагі грамадзян дабрабыт Рэспублікі Беларусь: пытанні як паўсядзённага жыцця краіны, так і яе будучыні, уключаючы перспектывы далейшага развіцця адносін на знешнім контуры.
У рамках сацыялагічнага забеспячэння рэспубліканскага рэферэндуму з 15 лістапада па 4 снежня 2021 года сацыялагічным кансорцыумам ДНУ "Інстытут сацыялогіі НАН Беларусі" сумесна з Аналітычным цэнтрам EcooM праведзена маштабнае сацыялагічнае даследаванне "Беларусь. Меркаванне пра будучыню". У апытанні прынялі ўдзел 10 217 рэспандэнтаў. Генеральная сукупнасць - эканамічна занятае насельніцтва. Выбарка шматступеньчатая, стратыфікаваная (па рэгіёне пражывання і тыпе населенага пункта), з кантролем квот полу і ўзросту. Даследаваннем ахоплены ўсе вобласці Беларусі, Мінск, 52 раёны (з улікам 9 раёнаў сталіцы), амаль 350 арганізацый і прадпрыемстваў розных сфер і форм уласнасці.
Варта адзначыць высокую цікавасць грамадзян да анкетавання, большасць з якіх станоўча ўспрынялі цікавасць сацыёлагаў да іх пазіцыі і ацэнкі. Апытанне ўспрынята як магчымасць данесці сваё меркаванне аб бягучых працэсах, хвалюючых праблемах і будучым краіны. Грамадзяне выказвалі пажаданні больш частага правядзення такіх сацыялагічных даследаванняў. Пры жывым абмеркаванні з інтэрв'юерамі рэспандэнты ўзнімалі пытанні водазабеспячэння, будаўніцтва аб'ектаў сацыяльнай і забаўляльнай інфраструктуры, якасці і даступнасці медыцынскага абслугоўвання і іншыя. Усе заўвагі, якія паступілі, пачуты і пастаўлены на кантроль мясцовай выканаўчай уладай.-Э-
