24 студзеня, Мінск /Кар. БЕЛТА/. Прагнозы па развіцці пандэміі COVID-19 збываюцца не ў поўнай меры, таму трэба быць гатовымі да любых варыянтаў, заявіла старшыня камітэта па ахове здароўя Мінгарвыканкама, старшыня ГА "Беларускі саюз жанчын" Алена Богдан у эфіры тэлеканала СТБ, перадае БЕЛТА.
"Вельмі паказальна, калі наш кіраўнік дзяржавы задаў гэта пытанне на саміце кіраўнікоў СНД Ганне Паповай, вядучаму спецыялісту ў Расійскай Федэрацыі, яна пацвердзіла, што прагнозы - справа вельмі няўдзячная, іх дастаткова складана будаваць. Ніводны прагноз, які быў пабудаваны ў нашай краіне, поўнасцю не апраўдаўся, таму што вірус аказаўся муціруючым, складаным, непрадказальным, ён не ўкладваецца ў тыповыя законы эпідэміялогіі", - сказала Алена Богдан.
Яна лічыць, што трэба быць гатовымі да любых варыянтаў развіцця падзей. "Наша задача не столькі прагназаваць, колькі быць гатовымі да розных варыянтаў развіцця падзей. Як з вялікай колькасцю захварэлых дарослых, так і з вялікай колькасцю захварэлай моладзі, дзяцей. Гэта тыя пытанні, якія прапрацоўвае і камітэт па ахове здароўя, і Міністэрства аховы здароўя", - дадала яна.-0-
