21 кастрычніка, Мінск /Кар. БЕЛТА/. Начальнік Дэпартамента па грамадзянстве і міграцыі МУС Аляксей Бягун расказаў пра беларусаў, якія выехалі з мэтай працаўладкавання ва Украіну, Польшчу і краіны Балтыі, перадае карэспандэнт БЕЛТА.
"Мы маніторым гэту сітуацыю, адсочваем перамяшчэнне нашых грамадзян праз знешні контур, улічваем, што шэраг дзяржаў прадаставілі для беларускіх грамадзян рэжым пэўных прэферэнцый. Але лічым, што сітуацыя не крытычная і не наносіць сур'ёзнай шкоды нацыянальнай бяспецы. Мы не адчуваем значнай страты працоўных нацыянальных рэсурсаў", - расказаў Аляксей Бягун.
Паводле яго слоў, ва Украіну з верасня выехалі амаль 3 тыс. чалавек. "Мы зрабілі разбіўку па ўсіх катэгорыях грамадзян, улічылі, колькі непаўналетніх, пенсіянераў, непрацуючых. На тэрыторыю Польшчы быў самы вялікі ўезд - каля 10 тыс. чалавек. Латвія і Літва - значна менш. Вобразна кажучы, не больш за 500 чалавек выехалі ў гэтыя дзве краіны, - адзначыў начальнік дэпартамента. - І тут трэба ўлічваць, чаму людзі не вяртаюцца. У тым ліку гэта ўмовы каранціну, якія ўстаноўлены краінамі. Таму міграцыйную тэндэнцыю будзе відаць па выніках квартала і наогул шасці месяцаў".
Аляксей Бягун упэўнены, што ў сваёй большасці гэта працоўная міграцыя. "Частка з іх выязджае як працуючыя асобы. Думаю, гэта не незваротная, гэта працоўная міграцыя. Зразумела, што ўкраінцы прадаставілі пэўныя прэферэнцыі айцішнікам, палякі да гэтага часу прадастаўляюць прэферэнцыі ў адносінах да працуючых беларусаў, якія ў спрошчаным парадку прыцягваюцца для працоўнай дзейнасці і выязджаюць на работу", - сказаў ён.
Начальнік дэпартамента падкрэсліў, што нельга гаварыць, што пэўныя падзеі ў краіне справакавалі выезд беларускіх грамадзян. "Можа, пэўныя асобы, якія ставілі сабе за мэту ўжо даволі даўно пераехаць на ПМЖ у іншыя краіны, скарысталіся гэтым унутрыпалітычным крызісам для таго, каб звярнуцца з хадайніцтвам у кампетэнтныя органы Літвы або Польшчы аб прадастаўленні статусу бежанца, і вельмі часта стваралі так званую інфармацыйную карцінку, каб пацвердзіць, што з'яўляюцца ахвярамі за свае палітычныя погляды на тэрыторыі Беларусі", - сказаў ён на заканчэнне.-0-
