20 кастрычніка, Мінск /Кар. БЕЛТА/. Білеты на некаторыя паязды ў Беларусі будуць выглядаць па-новаму, паведамілі БЕЛТА ў прэс-цэнтры Беларускай чыгункі.
Новаўвядзенне закране паязды міжрэгіянальных ліній і рэгіянальных ліній бізнес-класа. Адносна міжнародных паяздоў усё застанецца па-ранейшаму. "Білеты стануць больш простымі і зразумелымі, інфармацыя на іх - больш нагляднай. У перспектыве месцаў, дзе можна аформіць праязныя дакументы на паязды з нумараванымі месцамі, стане больш", - адзначылі ў прэс-цэнтры.
Прычынай такіх змяненняў з'яўляецца паступовы пераход БЧ на новую тэхналогію афармлення з прымяненнем білетадрукавальных машын. Цяпер праязныя дакументы будуць на тэрмапаперы, прычым больш тоўстай, чым тая, што выкарыстоўваецца ў магазінах.
Білет абаронены двухмерным кодам, на ім ёсць індывідуальны шыфр сродкаў кантролю падатковых органаў. Тэкст можа быць на любой з дзяржаўных моў - беларускай або рускай, калі пакупнік аб гэтым папросіць.
Новую форму праязных дакументаў увядуць паступова. Гэты працэс пачнецца з вакзалаў станцый Брэст, Магілёў, Асіповічы і Пінск. Паэтапна такія білеты будуць выдаваць ва ўсіх пунктах рэалізацыі БЧ, у якіх ёсць адпаведныя тэхнічныя магчымасці. У пераходны перыяд можна будзе ўбачыць білеты старога і новага ўзору.-0-
