18 ліпеня, Мінск /Кар. БЕЛТА/. Канцэрн "Беллегпрам" завяршае падрыхтоўку каталога адзення дзелавога стылю для вучняў школ і гімназій да навучальнага года 2019/2020. У яго ўвойдуць новыя калекцыі прадпрыемстваў канцэрна, паведаміла карэспандэнту БЕЛТА прэс-сакратар канцэрна Наталля Краўцова.
"Канікулы ў самым разгары, бацькам самы час задумацца аб падрыхтоўцы да школы. Традыцыйна нашы прадпрыемствы прапануюць вялікі асартымент адзення, абутку і скургалантарэйных тавараў для вучняў. У аснове ўсіх калекцый дзелавога стылю - элегантнасць і камфорт, узаемазамяняльнасць, шматфункцыянальнасць, экалагічнасць і бяспека. Штогод калекцыі абнаўляюцца прыкладна на 80 працэнтаў", - адзначыла Наталля Краўцова.
Адзенне для школьнікаў выпускаюць 8 швейных прадпрыемстваў канцэрна ("Славянка", "БелКрэда", "Элод", "Надэкс", "Калінка", "Жлобінская швейная фабрыка", "Эліз" і "Панда") і арганізацыі трыкатажнай галіны ("Палессе", "Купалінка", "8 Сакавіка", "Свiтанак" Жодзіна, "Ромгіль-Тэкс"). "Галантэя" і ААТ "ЭКТБ" прапануюць шырокі выбар скургалантарэйнай прадукцыі. Таксама айчынныя вытворцы забяспечаць магазіны разнастайнымі мадэлямі абутку для хлопчыкаў (размерны рад 32 - 43,5) і дзяўчынак (размеры 32 - 40).
Паводле слоў Наталлі Краўцовай, калекцыі створаны з улікам апошніх модных тэндэнцый. Яны прадстаўлены лаканічнымі мадэлямі з элементамі вулічнай моды, адаптаванымі ў класічным ключы (у іх аснове класічны і паўсядзённы стыль). Камплекты, сарафаны, сукенкі, жакеты, спадніцы, штаны выкананы з сумесевых тканін у камбінацыі з плісіроўкай і трыкатажам у багатай каляровай гаме.
"Падкрэсліць індывідуальнасць вытворцы стараюцца арыгінальнымі дэталямі - устаўкі тасьмы, вышыўкі, стразы, металізаваныя люверсы і маланкі, гузікі, кнопкі, аздобленыя кантрасныя радкі. Адрозненне цяперашняй калекцыі - напаўненне вырабамі Plus Size", - дадала яна.
Яшчэ адна новая тэндэнцыя - зрушэнне пераваг у бок мадэлей, выкананых з трыкатажных палотнаў як для хлопчыкаў, так і для дзяўчынак. "Па-першае, гэта зручна, калі адзенне не мнецца і не скоўвае рухі. Па-другое, вырабы з трыкатажных палотнаў добра садзяцца на фігуру, што немалаважна, лёгкія ва ўжытку. Многія прадпрыемствы канцэрна прапануюць капсульныя калекцыі. Яны аб'яднаны пэўнай тэмай, таму ўсе рэчы спалучаюцца паміж сабой", - растлумачыла Наталля Краўцова.
Адзенне для хлопчыкаў прадстаўлена касцюмамі, якія складаюцца з пінжака і штаноў, камізэлькамі, кардыганамі, пуловерамі "2+1". Размерны рад - ад 26 па 52. Групы з рознай паўнатой даюць магчымасць знайсці свой касцюм любому школьніку (I, II, III, IV групы паўнаты). Навінкай для навучэнцаў старшай школьнай групы стаў касцюм з двухбортнай засцежкай, які ў гэтым сезоне набірае папулярнасць. Дапоўніць вобраз і зрабіць яго завершаным дапамогуць такія акцэнты, як стыльныя гальштукі, прыгожыя раменьчыкі і брошкі.
Парадуе пакупнікоў і сучасная калекцыя фармованых рукзакоў Galanteya павышанай трываласці з эрганамічнай цвёрдай спінкай. Спецыяльныя анатамічныя ўстаўкі, мацаванні і дадатковая падтрымка ў вобласці паясніцы, выкананы з паветрапранікальнага матэрыялу, дазваляюць падтрымліваць правільную паставу і прадухіляюць перагрэў. Для бяспекі дзіцяці прадугледжаны святлоадбівальныя элементы.
"Модна, зручна, якасна, камфортна і бяспечна - асноўныя патрабаванні пры вырабе адзення дзелавога стылю для вучняў. Вялікая колькасць створаных вобразаў парадуе пакупнікоў дызайнам, камфортнасцю і цэнавай даступнасцю", - расказала прэс-сакратар.
Усяго прадпрыемствы маюць намер паставіць у магазіны каля 550 тыс. вырабаў для дзяцей школьнага ўзросту. Новы каталог адзення на наступным тыдні будзе размешчаны на сайце канцэрна ў рубрыцы "Прапановы - Каталогі".-0-
