21 лютага, Мінск /Кар. БЕЛТА/. Беларускія вучоныя пацвердзілі, што імунітэт пасля перанесенага COVID-19 і вакцынацыі супраць гэтага захворвання найбольш надзейны варыянт аховы, паведаміў у інтэрв'ю карэспандэнту БЕЛТА рэктар Гомельскага дзяржаўнага медыцынскага ўніверсітэта ўрач-інфекцыяніст Ігар Стома.
Тэрмін "гібрыдны імунітэт" не новы, але адносна COVID-19 ён асабліва актуальны, адзначыў Ігар Стома. Ён прывёў прыклад аднаго з даследаванняў, якое праводзілася на базе Гомельскага дзяржаўнага медыцынскага ўніверсітэта. У міжнародным медыцынскім архіве клінічных даследаванняў ужо апублікаваны прэпрынт на англійскай мове. Вучоныя, у прыватнасці, сачылі за імунным адказам, гэта значыць імунагеннасцю, у тым ліку ўзроўнем антыцел у людзей, прышчэпленых вакцынамі "Спадарожнік V" і "Сінафарм".
Удзельнікі даследавання былі падзелены на дзве групы. У адну ўключылі серанегатыўных, гэта значыць людзей, якія не хварэлі на інфекцыю COVID-19 і не мелі антыцел да прышчэпкі. У другой групе былі серапазітыўныя ўдзельнікі, інакш кажучы, якія перахварэлі на COVID-19 і маюць нейкі ўзровень антыцел. "Мы ўстанавілі, што ўзровень антыцел у выпадку вакцынацыі і "Спадарожнікам V", і "Сінафарм" быў дакладна і істотна вышэйшы ў другой групе. Такая тэндэнцыя прасочвалася аж да 6 месяцаў", - адзначыў інфекцыяніст.
Калі гаварыць аб імунітэце выздавеўшых ад COVID-19, гэта значыць рэканвалесцэнтаў, як правіла, ён менш ўстойлівы і напружаны, чым поствакцынальны. Перанесены амікрон ніякім чынам не гарантуе ахову ад паўторнага захворвання. Амікрон у прышчэпленых людзей (яны перанясуць захворванне лёгка або бессімптомна) прастымулюе імунную ахову. І наадварот: частка людзей, якія перанеслі амікрон, пасля гэтага пройдзе вакцынацыю. Такі гібрыдны імунітэт лічыцца самым эфектыўным і надзейным варыянтам аховы, сказаў рэктар на заканчэнне.-0-
