2 сакавіка, Мінск /Кар. БЕЛТА/. Беларускія вучоныя ацанілі ўзровень клетачнага імунітэту супраць COVID-19 праз 3, 6 і 9 месяцаў, паведаміў карэспандэнту БЕЛТА дырэктар Інстытута біяфізікі і клетачнай інжынерыі НАН Беларусі Андрэй Ганчароў.
На базе інстытута на працягу года, з канца 2020-га, праводзілася даследаванне, у ходзе якога ацэньваўся клетачны і гумаральны імунітэт з інтэрвалам тры, шэсць і дзевяць месяцаў пасля перанесенага COVID-19.
"Па клетачным імунітэце мы ўбачылі вялікую розніцу ў адказе на S, N і на M бялок. Устаноўлена, што найбольш доўга захоўваецца клетачны імунітэт да S- і М-бялкоў. Калі сцісла, то да шасці месяцаў пасля перанесенага захворвання (няважна, праходзіла яно ў лёгкай, сярэдняцяжкай або цяжкай форме) зніжалася колькасць антыгенспецыфічных Т-клетак - гэты паказчык характарызуе клетачны імунітэт. А да 9-га месяца, наадварот, адбывалася нарастанне ўзроўню антыгенспецыфічных Т-клетак і іх колькасць практычна дасягала паказчыка тры месяцы", - сказаў Андрэй Ганчароў.
Вучоныя лічаць, што ва ўмовах пастаяннай цыркуляцыі каранавіруса адбываецца ўмацаванне імунітэту. "Відаць, гэта звязана з дадатковай антыгеннай стымуляцыяй. Інакш кажучы, сустрэча з каранавірусам падсілкоўвае імунітэт у перахварэўшых", - адзначыў дырэктар інстытута.
Цяпер рыхтуецца навуковая публікацыя, у якой будуць адлюстраваны рэзультаты даследавання. "Думаю, у сярэдзіне года яна павінна выйсці", - рэзюмаваў Андрэй Ганчароў.-0-
