Беларускія студэнты прымуць удзел ва Усерасійскім працоўным праекце медыцынскіх студатрадаў

4 чэрвеня, Мінск /Кар. БЕЛТА/. Студэнты з Беларусі і Кыргызстана з 1 ліпеня пачнуць працаваць у трох чэлябінскіх бальніцах у ходзе праекта студэнцкіх медыцынскіх атрадаў, паведамляе ТАСС са спасылкай на кіраўніка Чэлябінскага рэгіянальнага аддзялення Расійскіх студэнцкіх атрадаў Юрыя Болдырава.

"У гэтым годзе ўпершыню ў Чэлябінску з 1 ліпеня па 25 жніўня пройдзе ўсерасійскі працоўны праект студэнцкіх медыцынскіх атрадаў - у горадзе будзе працаваць студатрад "Клініка". У яго радах 80 чалавек з усёй Расіі і таксама ўпершыню будуць студэнты з Беларусі і Кыргызстана", - сказаў Юрый Болдыраў.

"Работа ва Усерасійскім медыцынскім атрадзе дасць магчымасць будучым урачам вызначыцца з напрамкам свайго прафесійнага развіцця", - адзначыў кіраўнік Чэлябінскага рэгіянальнага аддзялення Расійскіх студэнцкіх атрадаў.

Ён дадаў, што маладыя людзі будуць выконваць абавязкі санітараў, прыбіральшчыкаў памяшканняў і медыцынскіх статыстаў, а студэнты старшых курсаў зоймуць пасты медыцынскіх сясцёр. Усе ўдзельнікі праекта праходзяць прафесійнае навучанне на бясплатнай аснове па выбранай спецыяльнасці. Арганізатары працоўнага праекта - Расійскія студэнцкія атрады (пры падтрымцы чэлябінскага рэгіянальнага аддзялення) пры садзейнічанні Міністэрства аховы здароўя Чэлябінскай вобласці і Паўднёва-Уральскага дзяржаўнага медыцынскага ўніверсітэта.-0-