Беларускія праваахоўнікі на сесіі ў Вене: мы адкрытыя для абмену інфармацыяй з замежнымі калегамі

20 мая, Мінск /Кар. БЕЛТА/. Беларускія праваахоўнікі адкрыты для абмену інфармацыяй з замежнымі калегамі. Аб гэтым заявіў намеснік начальніка галоўнага ўпраўлення па наркакантролі і процідзеянні гандлю людзьмі МУС Беларусі Андрэй Кудрыцкі, выступаючы на 34-й сесіі Камісіі ААН па папярэджанні злачынстваў і крымінальным правасуддзі, якая праходзіць у Вене, паведамілі БЕЛТА ў МУС.

Удзельнікі сесіі абмяркоўваюць пытанні процідзеяння гандлю людзьмі, кантрабандзе наркотыкаў, кіберзлачыннасці, тэрарыстычнай і экстрэмісцкай дзейнасці. "Прагрэс у барацьбе з сучаснай злачыннасцю магчымы толькі пры сумесным супрацоўніцтве і скаардынаваных намаганнях краін на аснове міжнародных дагавораў і канвенцый ААН. Важна забяспечыць эфектыўную рэалізацыю існуючых шматбаковых дакументаў", - падкрэсліў у сваім выступленні Андрэй Кудрыцкі, які ўзначальвае беларускую дэлегацыю.

Ён таксама дадаў, што наша краіна заўсёды выступае за ўсебаковае супрацоўніцтва ў барацьбе са злачыннасцю. "У Беларусі ёсць паспяховы вопыт выяўлення і нейтралізацыі крымінальных сетак. Мы гатовы дзяліцца напрацоўкамі. Беларускія праваахоўныя органы не ізалююцца ад знешняга свету. Мы адкрытыя для абмену інфармацыяй, аператыўных распрацовак у адносінах да ўсіх катэгорый злачынцаў, гатовы супрацоўнічаць, дзяліцца ведамі і навыкамі", - падкрэсліў намеснік начальніка галоўнага ўпраўлення.-0-