15 лістапада, Мінск /Кар. БЕЛТА/. Беларускія медыкі аказваюць дапамогу пацярпелым ад слёзатачывага газу і вадамётаў бежанцам і журналістам, паведаміла начальнік упраўлення аховы здароўя Гродзенскага аблвыканкама Людміла Кеда. Такая інфармацыя размешчана ў Telegram-канале прэс-службы Міністэрства аховы здароўя, перадае БЕЛТА.
Як адзначыла Людміла Кеда, дапамогу ўсім пацярпелым на месцы гатовы аказаць спецыялісты ўстаноў аховы здароўя Гродна.
"У гэтыя мінуты на дапамогу дзяжурнай брыгадзе хуткай дапамогі выехала яшчэ адна машына са спецыялістамі. Дзяжурная брыгада аператыўна аказвае меддапамогу ўсім пацярпелым ад слёзатачывага газу і вадамётаў бежанцам і журналістам, аднак колькасць пацярпелых расце", - адзначылі ў прэс-службе.
Галоўнае ўпраўленне аховы здароўя Гродзенскага аблвыканкама распрацавала парадак аказання меддапамогі бежанцам, якія знаходзяцца ў прыгранічнай зоне. На пагранпераходзе "Брузгі" дзяжурыць брыгада хуткай медыцынскай дапамогі (урач і два фельчары). Пры масавых паступленнях гэта брыгада стане каардынатарам па арганізацыі накіравання патокаў пацыентаў ва ўстановы аховы здароўя Гродна.
У прэс-службе адзначылі, што з 10 да 16 лістапада ўрачы, якія дзяжурылі на граніцы, аказалі меддапамогу 21 грамадзяніну з Марока, Турцыі, Кубы, Ірака, Шры-Ланкі, Сірыі, Конга, Кот-д-Івуара, Судана. Для стацыянарнага лячэння шпіталізаваны чатыры пацыенты - адзін дарослы і трое дзяцей. Асноўныя скаргі, з якімі звяртаюцца людзі, - слабасць, кашаль, тэмпература. Гэта звязана з пастаянным знаходжаннем на вуліцы, пераахаладжэннем і вільготным адзеннем. За апошнія некалькі гадзін звярнуліся людзі са скаргамі на боль і рэзь у вачах, а таксама цяжкасць дыхання.-0-
