26 студзеня, Мінск /Кар. БЕЛТА/. Беларускія лясгасы ў мінулым годзе задаволілі больш за 240 тыс. заявак на дровы, паведамілі БЕЛТА ў прэс-службе Міністэрства лясной гаспадаркі.
Лясгасамі быў рэалізаваны 1 646 841 куб.м дрывяной драўніны насельніцтву, што на 13 працэнтаў больш, чым у 2021 годзе. У Мінлясгасе падкрэслілі, што трэндам мінулага года стала павелічэнне попыту на колатую прадукцыю. Усяго было рэалізавана 20 228 куб.м колатых дроў, а гэта амаль у два разы больш, чым у 2021 годзе.
"У гэтым годзе лясгасы плануюць устанавіць больш за 70 станкоў дрывакольнага абсталявання. Адпаведнае даручэнне было дадзена міністрам лясной гаспадаркі Аляксандрам Куліком. Пры гэтым асноўнымі арганізацыямі, адказнымі за забеспячэнне насельніцтва колатымі відамі прадукцыі, з'яўляюцца гарадскія аддзелы паліва. Рэалізацыяй дроў насельніцтву займаюцца таксама і арганізацыі прыватнай формы ўласнасці. Павелічэнню попыту на прадукцыю садзейнічала і адкрыццё ў мінулым годзе гандлёвых пляцовак лясгасаў, дзе насельніцтву прапануюцца дровы як у невялікіх сетках, так і ў біг-бэгах. Па стане на 26 студзеня працуюць ужо 8 аб'ектаў гандлю пад фірменным брэндам "Лясны домік", - расказалі ў прэс-службе.
У мінулым годзе лясгасы штодзённа задавальнялі да 1,5 тыс. заявак. Пры гэтым грамадзяне пачулі просьбы лясгасаў і ў адрозненне ад 2021 года ў асноўным загадзя паклапаціліся аб набыцці паліўнай прадукцыі, што дало магчымасць пазбегнуць штучных чэргаў у многіх рэгіёнах і ў спакойным рэжыме адгрузіць прадукцыю.-0-
