22 лістапада, Мінск /Кар. БЕЛТА/. Беларускі гуманітарны груз дастаўлены ў Судан, паведамілі БЕЛТА ў Міністэрстве па надзвычайных сітуацыях.
Ратавальнікі перадалі прадукты харчавання, медыцынскія прэпараты і матэрыяльна-тэхнічныя сродкі суданскаму боку для пераадолення наступстваў стыхійнага бедства.
Як паведамлялася, МНС па даручэнні кіраўніка дзяржавы і ў мэтах выканання пастановы Савета Міністраў арганізавала комплекс мерапрыемстваў па фарміраванні і дастаўцы гуманітарнага грузу ў Рэспубліку Судан. Дастаўка і фарміраванне гуманітарнай дапамогі арганізаваны сумесна з Міністэрствам замежных спраў, Мінтрансам, Гродзенскім аблвыканкамам і "Беллегпрамам".
Учора самалёт ІЛ-76 з гуманітарным грузам вылецеў у Судан у суправаджэнні беларускіх ратавальнікаў з Мінска ў Хартум. Групу супрацоўнікаў МНС, якія суправаджаюць гуманітарны груз, узначальвае першы намеснік міністра па надзвычайных сітуацыях Аляксандр Худалееў.
Як адзначылі ў МНС, Беларусь упершыню аказвае гуманітарную дапамогу Судану. Усяго з 1999 года наша краіна арганізавала 76 гуманітарных місій, у ходзе якіх дапамога аказана 32 краінам.-0-
