10 лютага, Мінск /Кар. БЕЛТА/. Беларускі Чырвоны Крыж перадасць гуманітарную дапамогу пацярпелым ад землетрасення ў Сірыі, паведаміў карэспандэнту БЕЛТА генеральны сакратар Беларускага Чырвонага Крыжа Дзмітрый Шаўцоў.
"Мы даведаліся, што адпраўляецца борт МНС з гуманітарнай дапамогай у Сірыйскую Рэспубліку, звязаліся з міністрам па надзвычайных сітуацыях, яго першым намеснікам, і яны сказалі, што могуць прыняць ад нас пэўны танаж дапамогі. Таму сёння ў 13.00 мы плануем перадаваць для Сірыі коўдры - каля 1 тыс. штук, спальныя мяшкі - 200 штук і турыстычныя дыванкі - каля 150 штук. Гэта значыць тое, што мы змаглі набыць на сённяшні момант, - расказаў Дзмітрый Шаўцоў. - Мы не аб'яўлялі збор, таму што ён сам па сабе вельмі працаёмкі і вельмі затратны па часе. Таму што нам спачатку трэба даць кліч, што неабходна збіраць. Потым трэба правесці сартаванне, разумець, дзе гэта ўсё будзе акумулявацца, потым гэта цэнтралізавана перавозіць. Гэта вельмі працяглы працэс. А трагедыя здарылася тут і цяпер, і патрэбна першая дапамога, таму мы самі набылі гэтыя неабходныя рэчы і сёння перадаём".
Дзмітрый Шаўцоў нагадаў, што з 9 лютага Беларускі Чырвоны Крыж аб'явіў збор сродкаў для пацярпелых пры землетрасеннях у Турцыі і Сірыі. "Збор грашовых сродкаў будзе адбывацца да канца лютага. 1 сакавіка мы ўжо будзем разумець, якую колькасць сродкаў сабралі. Гэта ў рамках надзвычайнага закліку, які аб'явіла Міжнародная федэрацыя Чырвонага Крыжа для ўсіх краін. У тым ліку і мы адгукнуліся. Пералічым усе сродкі на федэрацыю, а яна потым ужо будзе цэнтралізавана іх перадаваць для турэцкага і сірыйскага боку", - дапоўніў ён.-0-
