03 чэрвеня 2025, 18:16

Беларусь зацікаўлена развіваць міжрэгіянальнае супрацоўніцтва з Прыморскім краем

3 чэрвеня, Мінск /Кар. БЕЛТА/. Беларусь зацікаўлена развіваць міжрэгіянальнае супрацоўніцтва з Прыморскім краем. Аб гэтым заявіла старшыня Савета Рэспублікі Наталля Качанава ў час сустрэчы з губернатарам Прыморскага края Расійскай Федэрацыі Алегам Кажамякам, перадае карэспандэнт БЕЛТА.

"Паміж Беларуссю і Прыморскім краем склаліся добрыя і дружалюбныя адносіны. Наш Прэзідэнт Аляксандр Рыгоравіч даволі часта сустракаецца з вамі і гаворыць заўсёды аб тым, што Прыморскі край, нягледзячы на далёкасць, - гэта наша зямля. Мы разумеем, што там жывуць нашы добрыя сябры, браты, - адзначыла Наталля Качанава. - Мы разумеем, што нам трэба далей узаемадзейнічаць, і ўзаемадзеянне гэта можа быць абсалютна па ўсіх напрамках. Але для нас вельмі важна рэгіянальнае супрацоўніцтва. Наш Прэзідэнт надае гэтаму вельмі сур'ёзнае значэнне. Толькі за мінулы год 36 дэлегацый на чале з губернатарамі Расійскай Федэрацыі наведалі нашу краіну, і заўсёды Аляксандр Рыгоравіч сустракаецца з губернатарамі. Больш за 100 візітаў на ўзроўні намеснікаў кіраўнікоў рэгіёнаў Расійскай Федэрацыі, міністраў, гэта значыць даволі цеснае супрацоўніцтва".

Спікер падкрэсліла, што для Савета Рэспублікі, які з'яўляецца органам тэрытарыяльнага прадстаўніцтва, міжрэгіянальнае супрацоўніцтва вельмі важна. "Мы надаём асаблівае значэнне гэтаму напрамку ў сваёй дзейнасці, - сказала Наталля Качанава. - Цяпер мы рыхтуемся да Форуму рэгіёнаў. У бягучым годзе мы будзем праводзіць XII Форум рэгіёнаў Беларусі і Расіі ў Ніжнім Ноўгарадзе. Я думаю, вы будзеце ўдзельнікамі гэтага форуму. Ужо 77 суб'ектаў Расійскай Федэрацыі заявіліся для ўдзелу ў гэтым форуме, а з нашага боку абсалютна ўсе вобласці будуць прымаць удзел. Таму мы шчыра будзем рады сустрэчы з вамі на палях форуму. Я думаю, што мы прырасцём новымі кантрактамі, пагадненнямі. Таму што мы разумеем, што гэта на карысць нашых народаў і нашых краін".

"Для нас гандлёва-эканамічнае супрацоўніцтва вельмі важнае. Спадзяюся, што нейкія новыя праекты з'явяцца паміж Прыморскім краем і Беларуссю. Я думаю, што нам трэба і з заканадаўчай уладай больш працаваць. Супрацоўніцтва парламентарыяў на сучасным этапе вельмі важна, калі народныя прадстаўнікі ўзаемадзейнічаюць, і на многіх міжнародных пляцоўках мы гаворым праўду аб тым, што адбываецца ў нашых краінах, як мы супрацоўнічаем. Вядома, гэта дарагога каштуе, - падкрэсліла старшыня Савета Рэспублікі. - Мы заўсёды будзем рабіць усё для таго, каб прынятыя рашэнні і дамоўленасці, якія былі дасягнуты на вышэйшым узроўні, нашымі ўрадамі, кіраўніцтвам абласцей, рэгіёнаў - выконваліся. Таму што нельга сёння працаваць інакш. Мы павінны працаваць так, каб гэта было эканамічна выгадна для нашых краін і, вядома, рэзультатыўна. Таму мы ў любым выпадку падключаемся да вырашэння ўсіх пытанняў і задач, якія ставіць перад намі Прэзідэнт краіны, і вы можаце заўсёды разлічваць на нас для таго, каб добрыя адносіны паміж Беларуссю і Прыморскім краем прадаўжалі таксама дынамічна развівацца. Я ўпэўнена, што так і будзе".

Наталля Качанава асобна спынілася на супрацоўніцтве ў культурнай сферы. "Я хацела б падзякаваць за тое, што сёння вы прывезлі майстроў мастацтваў. Убачыць на сцэне Вялікага тэатра Рэспублікі Беларусь артыстаў з Прыморскага края - гэта, вядома, цудоўна", - дапоўніла спікер.-0-