8 кастрычніка, Мінск /Кар. БЕЛТА/. Беларусь пры будаўніцтве АЭС шырока выкарыстоўвае механізмы мжнародных ацэначных місій і партнёрскіх праверак, каб атрымаць кваліфікаваны знешні экспертны погляд. Аб гэтым паведаміў журналістам міністр па надзвычайных сітуацыях Уладзімір Вашчанка перад пачаткам сустрэчы з прадстаўнікамі місіі Міжнароднага агенцтва па атамнай энергіі EPREV (Emergency Preparedness Review) па разглядзе аварыйнай гатоўнасці і рэагавання, перадае карэспандэнт БЕЛТА.
"Беларусь будуе першую АЭС, робіць гэта па сучасных міжнародных стандартах бяспекі. Мы шырока выкарыстоўваем механізмы міжнародных ацэначных місій і партнёрскіх праверак, каб атрымаць кваліфікаваны знешні экспертны погляд і рэкамендацыі па іх дасягненні. Любая краіна добраахвотна прымае рашэнне аб запрашэнні такіх місій. Мы гэта робім перш за ўсё для сябе, удасканалення сістэмы ядзернай і радыяцыйнай бяспекі ў краіне і ўсіх яе кампанентаў, уключаючы сістэму аварыйнай гатоўнасці і рэагавання", - удакладніў Уладзімір Вашчанка.
Ён адзначыў, што ў розных ацэначных місій - розныя задачы, тэматыка і ахоп разглядаемых пытанняў. "Напрыклад, місія 2016 года (місія МАГАТЭ па комплекснай ацэнцы рэгулюючай інфраструктуры ядзернай і радыяцыйнай бяспекі (IRRS). - Заўвага БЕЛТА) ацэньвала ўсю рэгулюючую інфраструктуру ў цэлым, у той час як EPREV будзе ацэньваць вузкае пытанне гатоўнасці і рэагавання на ядзерныя аварыі і радыелагічныя аварыйныя сітуацыі. Забеспячэнне ядзернай і радыяцыйнай бяспекі - комплекснае і шматграннае пытанне. Нам важна не ўпусціць ніводны з аспектаў яе забеспячэння", - адзначыў міністр.
Місія Міжнароднага агенцтва па атамнай энергіі EPREV па разглядзе аварыйнай гатоўнасці і рэагавання будзе працаваць у Беларусі па 20 кастрычніка. У складзе дэлегацыі - намеснік генеральнага дырэктара МАГАТЭ Хуан Карлас Лентыха, начальнік цэнтра па інцыдэнтах і аварыйных сітуацыях МАГАТЭ Алена Буглова, кіраўнік місіі Марына Нізамска, каардынатар Рамон дэ ла Вега, а таксама эксперты Юка Купіла, Філіп Вілар Велтэр, Майкл Скот, Эдвард Метке, Бушра Насім, Марыэль Коньін.
Паслугі па разглядзе аварыйнай гатоўнасці МАГАТЭ прадастаўляе па запыце дзяржавам-членам у мэтах ацэнкі ўзроўню іх гатоўнасці да ядзернай або радыелагічнай аварыйнай сітуацыі. Місія EPREV садзейнічае павышэнню нацыянальнага патэнцыялу аварыйнага рэагавання ў адпаведнасці з нормамі бяспекі МАГАТЭ.-0-
