18 лістапада, Мінск /Кар. БЕЛТА/. Беларусь нацэлена развіваць супрацоўніцтва з расійскімі калегамі ў сферы адукацыі, заявіў міністр адукацыі Ігар Карпенка ў час сустрэчы з міністрам навукі і вышэйшай адукацыі Расіі Валерыем Фальковым, паведамляе карэспандэнт БЕЛТА.
"Беларусь нацэлена на прадаўжэнне супрацоўніцтва з расійскімі калегамі ў сферы адукацыі, а таксама на выбудоўванне канструктыўнага дыялогу па падтрымцы фундаментальных каштоўнасцей вышэйшай адукацыі і акадэмічных свабод", - сказаў Ігар Карпенка.
У якасці аднаго з прыкладаў такога супрацоўніцтва міністр прывёў Форум ВНУ інжынерна-тэхналагічнага профілю Саюзнай дзяржавы, які з 2012 года штогод праводзіцца на інавацыйных пляцоўках Беларускага нацыянальнага тэхнічнага ўніверсітэта. "Праведзеныя дзевяць форумаў ВНУ інжынерна-тэхналагічнага профілю Саюзнай дзяржавы прадэманстравалі адзінства поглядаў, падыходаў да вырашэння стратэгічных задач маладзёжнай палітыкі ў галіне інтэграцыі адукацыі, навукі, інавацый, прадпрымальніцтва, - адзначыў міністр. - Форум ператварыўся ў буйнейшую на ўсёй еўразійскай прасторы, аўтарытэтную і даступную пляцоўку, на якой прадстаўнікі вузаўскай навукі і студэнцтва атрымалі ўнікальную магчымасць дэманстраваць свае інавацыйныя ідэі, тэхналогіі і распрацоўкі ў самых розных галінах навукі і тэхнікі, абменьвацца вопытам адносна шырокага кола пытанняў, уключаючы сферу адукацыі".
Ігар Карпенка падкрэсліў, што дзякуючы форуму наладжана цеснае супрацоўніцтва з вядучымі расійскімі ВНУ ў плане навучання, стажыровак, павышэння кваліфікацыі студэнтаў і выкладчыкаў па напрамках і спецыялізацыях, падрыхтоўка па якіх у Беларусі не праводзіцца. Арганізаваны шырокі ўзаемны навуковы абмен. Створаны банк даных таленавітай моладзі ў галіне навукова-даследчай, інавацыйнай, прадпрымальніцкай дзейнасці, студэнты дзвюх краін прымаюць удзел у профільных алімпіядах і спартакіядах Саюзнай дзяржавы.
Міністр нагадаў, што ў час правядзення IX Форуму ВНУ інжынерна-тэхналагічнага профілю Саюзнай дзяржавы 26-30 кастрычніка на базе БНТУ адбылося абмеркаванне з прадстаўнікамі Пастаяннага камітэта Саюзнай дзяржавы ключавых пытанняў фінансавання праекта і магчымасці яго рэалізацыі за кошт сродкаў бюджэту Саюзнай дзяржавы.
Сёння беларуская дэлегацыя таксама наведала Цэнтр дадатковай адукацыі "Дзіцячы тэхнапарк "Кванторыум" горада Каралёў Маскоўскай вобласці, дзе азнаёмілася з умовамі, створанымі для дадатковай адукацыі дзяцей у сферы інжынерных навук.-0-
