24 лістапада, Мінск /Кар. БЕЛТА/. Беларусь можа прыняць удзел у маштабным даследаванні па ацэнцы рухальнай актыўнасці дзяцей школьнага ўзросту, паведаміла журналістам загадчыца кафедры гігіены і эпідэміялогіі БелМАПА, кандыдат медыцынскіх навук, дацэнт Алена Гузік, перадае карэспандэнт БЕЛТА.
Такое даследаванне праводзіцца кожныя чатыры гады. "Цяпер абмяркоўваецца пытанне аб тым, што, магчыма, у наступным годзе Беларусь паўдзельнічае ў гэтым даследаванні. Мы будзем ведаць асаблівасці сітуацыі ў нашай краіне", - сказала Алена Гузік.
Сусветная арганізацыя аховы здароўя рэкамендуе для дзяцей старэйшых за пяць гадоў і падлеткаў 60 мінут рухальнай актыўнасці штодзённа. Па выніках даследаванняў, праведзеных у 45 еўрапейскіх краінах у 2018 годзе з задзейнічаннем прыкладна 227 тыс. дзяцей, у Еўрапейскім рэгіёне толькі 19 працэнтаў дзяцей фізічна актыўныя, гэта значыць рухаюцца не менш за 60 мінут у дзень. Таму праблема нізкай рухальнай актыўнасці ёсць, адзначыла загадчыца кафедры.
Яна нагадала, што нізкая рухальная актыўнасць - фактар рызыкі развіцця захворванняў сардэчна-сасудзістай, дыхальнай, касцёва-мышачнай сістэм і нават анкалагічных захворванняў. Дастатковая рухальная актыўнасць патрэбна і дарослым, гэта прафілактыка хваробы Альцгеймера.
Паводле слоў Алены Гузік, у Беларусі створаны добрыя ўмовы для забеспячэння рухальнай актыўнасці. Ва ўсіх школах праводзяцца не толькі ўрокі фізкультуры, але прадугледжана і гадзіна здароўя і спорту. Працуюць спартыўныя гурткі, секцыі, праводзяцца спаборніцтвы. На ўроках абавязковыя фізкультмінуткі. Гэта ўсё элементы прафілактыкі гіпадынаміі.
"Але мы дакладна павінны разумець, што толькі школа не вырашыць праблему рухальнай актыўнасці. Трэба, каб бацькі і самі дзеці разумелі, што гэта важна і трэба займацца рухальнай актыўнасцю ў дамашніх умовах", - падкрэсліла Алена Гузік.-0-
