17 верасня, Мінск /Кар. БЕЛТА/. Пытанні інтэнсіфікацыі двухбаковага супрацоўніцтва ў прыродаахоўнай дзейнасці, у тым ліку меры барацьбы са змяненнем клімату абмеркавалі ў Ерэване міністр прыродных рэсурсаў і аховы навакольнага асяроддзя Беларусі Андрэй Худык і міністр навакольнага асяроддзя Арменіі Эрык Грыгаран. Аб гэтым БЕЛТА паведамілі ў прэс-службе Мінпрыроды.
На сустрэчы быў разгледжаны і ход рэалізацыі мемарандума аб супрацоўніцтве ў галіне аховы навакольнага асяроддзя паміж двума ведамствамі, які быў падпісаны ў 2016 годзе. Згодна з дакументам бакі выказалі гатоўнасць узаемадзейнічаць па такіх напрамках, як змякчэнне наступстваў і адаптацыя да змянення клімату; ахова атмасфернага паветра; кіраванне хімічнымі рэчывамі і адходамі; аднаўленне зямель, парушаных у выніку дзейнасці горназдабыўной прамысловасці і інш.
Бакі з задавальненнем адзначылі высокі ўзровень узаемадзеяння на пляцоўках міжнародных шматбаковых мерапрыемстваў, а таксама ў ходзе рэалізацыі праектаў міжнароднай тэхнічнай дапамогі ў рамках "Усходняга партнёрства".
Андрэй Худык заклікаў сумесна падумаць над актывізацыяй работы Міждзяржаўнага экалагічнага савета дзяржаў - удзельніц СНД. У якасці магчымых напрамкаў сумеснай дзейнасці ён прапанаваў: змякчэнне наступстваў і адаптацыю да змянення клімату, кіраванне асабліва ахоўнымі прыроднымі тэрыторыямі і стварэнне біясферных рэзерватаў, эканамічныя механізмы ўстойлівага прыродакарыстання.-0-
