17 верасня, Вена /Кар. БЕЛТА/. Беларусь адкрыта для кантактаў з Еўрапейскай камісіяй пры рэалізацыі нацыянальнага плана дзеянняў па выніках правядзення стрэс-тэстаў Беларускай АЭС. Аб гэтым заявіла сёння ў Вене начальнік Дэпартамента па ядзернай і радыяцыйнай бяспецы МНС (Дзяржатамнагляду) Вольга Лугаўская на сустрэчы з дэлегацыяй Еўрапейскай камісіі на чале з выконваючым абавязкі намесніка генеральнага дырэктара па каардынацыі пытанняў ядзернай энергетыкі Генеральнага дырэктарата па энергетыцы Еўракамісіі Масіма Гарыба, перадае карэспандэнт БЕЛТА.
Вольга Лугаўская нагадала, што на сайце Дзяржатамнагляду была апублікавана апісальная частка нацыянальнага плана дзеянняў па выніках стрэс-тэстаў. "Сам план пачаў імлементавацца яшчэ ў лютым бягучага года, - растлумачыла яна. - Апублікаваная апісальная частка ў большай меры прызначана для азнаямлення грамадскасцю". Пачалося ўжо выкананне дадатковых сейсмічных даследаванняў. Дадатковае фінансаванне на гэтыя мэты выдзелена.
Начальнік дэпартамента Дзяржатамнагляду таксама адзначыла, што нацыянальны план нельга назваць закансерваваным дакументам, у які нельга ўносіць змяненні. Калі па нейкіх прычынах будзе мэтазгодна ўнесці карэкціроўкі, гэта будзе зроблена. Напрыклад, у плане адлюстраваны мерапрыемствы даследчага характару, магчыма, па іх выніках патрэбны будуць дадатковыя мерапрыемствы, якія ўнясуць у нацплан.
Прадстаўнікі Еўракамісіі пацікавіліся, як у плане адлюстраваны рэкамендацыі, дадзеныя ў час партнёрскай праверкі Еўрапейскай групы рэгулятараў ядзернай бяспекі (ENSREG). Вольга Лугаўская запэўніла, што падрыхтаваны план улічвае рэкамендацыі Еўрасаюза.
Як паведамлялася, нацыянальны план дзеянняў змяшчае мерапрыемствы, накіраваныя на павышэнне ўзроўню бяспекі Беларускай АЭС, якія былі сфарміраваны па выніках стрэс-тэстаў БелАЭС і партнёрскай праверкі іх рэзультатаў. Праверка праведзена ENSREG у 2017-2018 гадах.
Стрэс-тэсты праводзяцца на ўсіх атамных электрастанцыях пасля аварыі на японскай АЭС "Фукусіма", каб ацаніць устойлівасць да экстрэмальных уздзеянняў. Стрэс-тэсты на Беларускай АЭС праведзены ў 2016 годзе па еўрапейскай методыцы з улікам рэкамендацый, заснаваных на распрацаваных Еўракамісіяй і Еўрапейскай групай рэгулятараў ядзернай бяспекі спецыфікацыях. Яны паказалі ўстойлівасць БелАЭС да экстрэмальных уздзеянняў.-0-
