18 верасня, Мінск /Кар. БЕЛТА/. Будучыня краіны залежыць непасрэдна ад прафесіяналізму сучасных педагогаў, адказнага і якаснага выканання імі грамадзянскага і грамадскага абавязку. Аб гэтым заявіў першы намеснік міністра адукацыі Аляксандр Бахановіч у час урачыстага адкрыцця конкурсу прафесійнага майстэрства "Настаўнік года Беларусі - 2023", перадае карэспандэнт БЕЛТА.
Цырымонія адкрыцця адбылася ў актавай зале галоўнага корпуса Беларускага дзяржаўнага педагагічнага ўніверсітэта. "Настаўнік года" - адна з яркіх падзей у дзейнасці сістэмы адукацыі. Значэнне конкурсу прафесійнага майстэрства, асабліва ў такой важнай сацыяльнай сферы, як навучанне і выхаванне падрастаючага пакалення, цяжка пераацаніць. Будучыня краіны залежыць непасрэдна ад сучасных педагогаў, іх прафесіяналізму, адказнага і якаснага выканання імі грамадзянскага і грамадскага абавязку. Паколькі якіх бы поспехаў у жыцці не дасягнуў чалавек, важнейшую ролю ў станаўленні яго асобы адыгрываюць менавіта педагогі. Менавіта прадстаўнікамі надзвычайна патрэбнай і высакароднай прафесіі ў многім вызначаецца тое, якімі стануць нашы дзеці, якія веды яны атрымаюць, які жыццёвы шлях выберуць. Прафесія настаўніка заўсёды была высокапаважанай, шануемай і асабліва важнай у любым грамадстве і дзяржаве. Чым больш маштабныя задачы дзяржава і народ ставіць у сваім развіцці, тым больш пашаны да працы настаўніка. У нашых школах вельмі шмат ініцыятыў, шмат творчасці, добрых і спагадлівых людзей", - сказаў Аляксандр Бахановіч.
Старшыня журы конкурсу, намеснік старшыні Пастаяннай камісіі па адукацыі, культуры і навуцы Палаты прадстаўнікоў Ірына Рынейская назвала сімвалічным адкрыццё педагагічнага форуму адразу пасля святкавання краінай самага маладога дзяржаўнага свята - Дня народнага адзінства. "Памятайце, за вамі стаяць вашы педагагічныя калектывы, вашы рэгіёны і вашы вучні, асабістыя перамогі якіх - гэта вашы асабістыя перамогі. Будзьце настойлівымі, мэтанакіраванымі, будзьце дастойныя высокага і гордага звання настаўніка. Вы пераможцы ўжо", - дала наказ яна ўдзельнікам конкурсу.
Усяго ў фінал конкурсу "Настаўнік года Беларусі - 2023" выйшла 56 педагогаў з сямі рэгіёнаў краіны. Ён праводзіцца па васьмі прадметных намінацыях. У суперфінал выйдуць 8 чалавек - па адным пераможцы ў кожнай намінацыі. Конкурсныя мерапрыемствы прадоўжацца па 28 верасня.-0-
