Сцяг Серада, 17 красавіка 2024
Усе навіны
Усе навіны
Грамадства
20 лютага 2024, 15:21

Бачыць комплексна, на перспектыву. Качанава правяла нараду з рэктарамі ВНУ Мінска

20 лютага, Мінск /Кар. БЕЛТА/. Установы вышэйшай адукацыі павінны выбудоўваць траекторыю свайго развіцця з улікам кадравай патрэбнасці ў краіне. Аб гэтым заявіла старшыня Савета Рэспублікі, упаўнаважаны прадстаўнік кіраўніка дзяржавы ў Мінску Наталля Качанава на сустрэчы з рэктарамі сталічных устаноў вышэйшай адукацыі, перадае карэспандэнт БЕЛТА.

Спікер нагадала, што на сустрэчы з членамі Рэспубліканскага савета рэктараў устаноў вышэйшай адукацыі кіраўнік дзяржавы Аляксандр Лукашэнка абазначыў задачы, якія стаяць перад установамі вышэйшай адукацыі краіны. "Задачы гэтыя сапраўды сур’ёзныя. Тэрмін (для вырашэння ўсіх выяўленых у вышэйшай адукацыі праблем. - Заўвага. БЕЛТА) устаноўлены 1 верасня 2024 года. Нам як заканадаўцам, людзям, якія працуюць з нарматыўнымі прававымі актамі, якія затым паступаюць Прэзідэнту, неабыякава, як будзе ісці выкананне тых даручэнняў, якія дадзены Прэзідэнтам", - сказала яна.

Наталля Качанава прапанавала старшыні Рэспубліканскага савета рэктараў Вадзіму Богушу прадставіць існуючыя прапановы і напрацоўкі, каб улічваць іх у далейшай рабоце, у тым ліку пры разглядзе нарматыўных прававых актаў. Паводле слоў спікера, гэта дасць магчымасць прымаць правільныя, абсалютна абгрунтаваныя, вывераныя рашэнні.

Старшыня Савета Рэспублікі звярнула ўвагу, што яшчэ на пасяджэнні Рэспубліканскага савета рэктараў устаноў вышэйшай адукацыі ў ліпені 2023 года з яе ўдзелам ВНУ былі арыентаваны на развіццё з улікам будучых патрэбнасцей. Наталля Качанава падкрэслівала, што кіраўнікі павінны дакладна ўяўляць перспектывы кожнай установы вышэйшай адукацыі ў краіне. Паводле яе слоў, важна разумець, наколькі тыя спецыялісты і спецыяльнасці, па якіх вучацца студэнты ў ВНУ, будуць запатрабаваны праз пяць, дзесяць гадоў. І гэта трэба ўлічваць пры ўдасканаленні сістэмы адукацыі - гэта работа праводзіцца пастаянна.

Гаворачы аб перспектывах, Наталля Качанава адзначыла: "Заўтра іншыя рэаліі, іншыя патрэбнасці рэальнага сектара эканомікі, гуманітарнай сферы. Мы павінны дакладна гэта разумець". Спікер прапанавала комплексна падумаць над тым, якім будзе развіццё ўстаноў вышэйшай адукацыі, "што сапраўды трэба, што будзе актуальна, запатрабавана". У сувязі з гэтым старшыня Савета Рэспублікі нагадала аб праведзеным 15 снежня 2023 года выязным пасяджэнні экспертна-кансультатыўнага савета пры Прэзідыуме Савета Рэспублікі на базе Віцебскага дзяржаўнага тэхналагічнага ўніверсітэта, адзначыўшы, што гэта ўстанова была выбрана не выпадкова. На савеце абмяркоўваліся перспектывы развіцця лёгкай прамысловасці ў Беларусі - гэта галіна ў ліку перспектыўных, якія неабходна развіваць.

"Сёння нашы тавары карыстаюцца попытам у іншых краінах. Але нам патрэбны спецыялісты", - заўважыла спікер. Наталля Качанава нагадала, што Віцебскі тэхналагічны ўніверсітэт некалі быў адзінай ВНУ ў краіне, якая рыхтавала дызайнераў, мадэльераў, спецыялістаў для гарбарнай галіны, абутковай прамысловасці. Гэта навучальная ўстанова і сёння мае нядрэнную вучэбную базу, кваліфікаваныя кадры. Аднак колькасці юнакоў і дзяўчат, якія туды паступаюць, недастаткова для забеспячэння цяперашніх патрэбнасцей эканомікі. "Нам сёння трэба намнога больш такіх спецыялістаў", - адзначыла яна. Спікер лічыць, што ў гэтым універсітэце трэба сканцэнтраваць лепшыя кадры для навучання адпаведных спецыялістаў.

Разам з тым, заўважыла Наталля Качанава, у Віцебскім тэхналагічным універсітэце вучацца вельмі шмат юнакоў і дзяўчат з Расіі, у тым ліку Пензы, Смаленска. Яны паступаюць туды, паколькі разумеюць, што ў Беларусі атрымаюць добрую спецыяльнасць, добрую адукацыю. "Мы гэта толькі вітаем. З вялікай радасцю прымаем юнакоў і дзяўчат на навучанне", - падкрэсліла яна.-0-
Падпісвайцеся на нас у
Twitter
Топ-навіны
Свежыя навіны Беларусі