17 снежня, Мінск /Кар. БЕЛТА/. Асноўныя палажэнні абноўленага закона аб знаходжанні іншаземцаў у Беларусі ўступяць у сілу з ліпеня 2020 года. Аб гэтым сёння паведаміў журналістам першы намеснік начальніка Дэпартамента па грамадзянстве і міграцыі МУС Віталь Навумчык, перадае карэспандэнт БЕЛТА.
Прэзідэнт Беларусі Аляксандр Лукашэнка падпісаў закон, якім унесены змяненні ў закон "Аб прававым становішчы замежных грамадзян і асоб без грамадзянства ў Рэспубліцы Беларусь". Раней распрацаваны МУС дакумент быў прыняты Палатай прадстаўнікоў і адобраны Саветам Рэспублікі Нацыянальнага сходу.
"Асноўная яго частка ўступіць у сілу 1 ліпеня. Мы павялічылі тэрмін вызвалення ад рэгістрацыі, на працягу якога іншаземцы пасля прыбыцця ў краіну вызваляюцца ад праходжання гэтай працэдуры, - з 5 сутак да 10. Выключылі з суб'ектаў рэгістрацыі гасцініцы, аб'екты агра-, экатурызму, установы аховы здароўя. Зыходзячы з той практыкі, якая ёсць сёння, немэтазгодна гэтыя юрыдычныя асобы адносіць да суб'ектаў рэгістрацыі", - сказаў Віталь Навумчык. Ён растлумачыў, што з моманту ўступлення ў сілу змяненняў у заканадаўстве гасцініцы не будуць абавязаны ажыццяўляць рэгістрацыю, але што датычыцца прадастаўлення інфармацыі ў АУС аб паселеных іншаземцах, то яны гэты абавязак павінны будуць выконваць.
"Таксама мы развілі кампетэнцыю падраздзяленняў па грамадзянстве і міграцыі органаў унутраных спраў. Цяпер усе адміністрацыйныя працэдуры, звязаныя з выкананнем гэтага закона, будуць ажыццяўляцца ад імя падраздзяленняў па грамадзянстве і міграцыі. Што датычыцца прымянення ў адносінах да парушальнікаў міграцыйнага заканадаўства пэўных мер прымушэння, то яны будуць прымяняцца ад імя органаў унутраных спраў", - паведаміў Віталь Навумчык.
"Закон вельмі запатрабаваны з улікам таго, што адбываецца не толькі ў свеце, але і, у прыватнасці, у нашай дзяржаве", - дадаў першы намеснік начальніка дэпартамента.
Як паведамлялася, рашэнне аб павелічэнні з 5 да 10 сутак тэрміну, на працягу якога іншаземцы, якія прыбылі ў Беларусь, абавязаны зарэгістравацца па месцы фактычнага часовага знаходжання, было прынята для развіцця турыстычнай і інвестыцыйнай прывабнасці краіны, спрашчэння дзелавых і прыватных кантактаў.
У цэлым дакумент накіраваны на ўдасканаленне шэрага прававых норм. Для забеспячэння максімальнай абароны інтарэсаў грамадства і дзяржавы ад пагроз рознага характару карэкціруюцца падставы для адмовы іншаземцу выдачы візы для ўезду ў Беларусь або ва ўездзе ў краіну. Адначасова вызначаецца механізм атрымання іншаземцамі і іх прадстаўнікамі інфармацыі аб уключэнні ў спіс асоб, уезд якіх у Беларусь забаронены або непажаданы.-0-
