20 лістапада, Мінск /Кар. БЕЛТА/. Арменія папрасіла партнёраў па Арганізацыі Дагавора аб калектыўнай бяспецы зняць з парадку дня дакумент аб дапамозе краіне. Аб гэтым заявіў генеральны сакратар АДКБ Імангалі Тасмагамбетаў 20 лістапада на сустрэчы з Прэзідэнтам Беларусі Аляксандрам Лукашэнкам, перадае карэспандэнт БЕЛТА.
Імангалі Тасмагамбетаў выказаў удзячнасць кіраўніку дзяржавы за магчымасць абмеркаваць напярэдадні важных мерапрыемстваў бягучую работу ў АДКБ і праблемныя пытанні ў дзейнасці арганізацыі. Як вядома, 22 лістапада ў Мінску адбудуцца пасяджэнні саветаў міністраў абароны, замежных спраў і Камітэта сакратароў саветаў бяспекі краін АДКБ. На 23 лістапада запланавана правядзенне сесіі Савета калектыўнай бяспекі АДКБ.
"Што датычыцца выканання плана мерапрыемстваў па рэалізацыі рашэнняў Савета калектыўнай бяспекі лістападаўскай сесіі мінулага года і прыярытэтных напрамкаў Беларусі, з 34 мерапрыемстваў 32 выкананы. Два мерапрыемствы, на жаль, выканаць не маглі. Гэта перш за ўсё нашы міжнародныя кантакты з еўрапейскімі міжнароднымі арганізацыямі, такімі як АБСЕ. З прычыны іх пазіцый. І другое пытанне - гэта даручэнне Савета калектыўнай бяспекі па дапрацоўцы рашэння па дапамозе Арменіі. Армянскі бок, хоць усе астатнія саюзнікі падтрымалі гэта рашэнне, не выказваў ніякага свайго інтарэсу да гэтага дакумента і, больш таго, у завяршальнай частцы нашай работы яны папрасілі яго наогул зняць з парадку дня", - сказаў генеральны сакратар АДКБ.
Як паведамлялася, у лістападзе 2022 года на саміце АДКБ у Ерэване прэм'ер-міністр Арменіі Нікол Пашынян адмовіўся падпісаць праект рашэння Савета калектыўнай бяспекі аб сумесных мерах па аказанні дапамогі Арменіі. Станіслаў Зась, які тады быў генеральным сакратаром АДКБ, пасля пасяджэння растлумачыў журналістам, што дакумент у цэлым узгоднены, вызначаны комплекс мер па аказанні дапамогі Арменіі. Але па шэрагу пазіцый праект рашэння меў патрэбу ў дапрацоўцы. Кіраўнікі дзяржаў даручылі дапрацаваць гэты дакумент і прадставіць яго ім на падпісанне.-0-
