Савецкія танкі з воінамі-дэсантнікамі 1-га Прыбалтыйскага фронту на вуліцах Барысава, 1944 год
1 ліпеня 1944 года Барысаў вызвалілі ад нямецка-фашысцкіх захопнікаў у ходзе Беларускай наступальнай аперацыі "Баграціён" - адной з буйнейшых ваенных аперацый Вялікай Айчыннай вайны.
На працягу першых дзён правядзення Беларускай наступальнай аперацыі "Баграціён" група нямецкіх армій "Цэнтр" пацярпела катастрафічнае паражэнне, яе галоўныя сілы былі акружаны і разгромлены.
Падзеі ў Беларусі прывялі Гітлера ў лютасць. 28 чэрвеня ён зняў генерал-фельдмаршала Э.Буша з пасады камандуючага групай армій "Цэнтр" і назначыў на яго месца генерал-фельдмаршала В.Модэля. Ён прыняў рашэнне арганізаваць абарону на ўсход ад Мінска. Сюды ж камандаванне вермахта тэрмінова перакінула ахоўныя і спецыяльныя часці з груп армій "Поўнач" і "Паўночная Украіна", аднак гэтых сіл аказалася недастаткова, каб спыніць прасоўванне Чырвонай Арміі. Савецкія войскі, абходзячы апорныя пункты ворага лясамі і балотамі, прадаўжалі рухацца ў напрамку Мінска, Слуцка і Маладзечна.
Вырашальныя схваткі разгарнуліся ў паласе наступлення 3-га Беларускага фронту на рацэ Бярэзіне, у раёне Барысава. У 1812 годзе гэта рака была сведкай гібелі арміі Напалеона, цяпер жа тут пад ударамі савецкай арміі цярпелі паражэнне войскі вермахта. У ноч на 1 ліпеня злучэнні Чырвонай Арміі ўварваліся ў Барысаў і на світанні, да 3 гадзін, вызвалілі горад. 13 часцям і злучэнням, якія вызначыліся пры вызваленні горада, прысвоены ганаровыя назвы "Барысаўскіх".
У выніку наступлення савецкіх войскаў 1 ліпеня вызвалены Бягомльскі, Шаркаўшчынскі, Грэскі, Барысаўскі раёны.-0-
