12 лютага, Мінск /Кар. БЕЛТА/. Аналітык БІСД Антон Дударонак у эфіры тэлеканала АНТ расказаў, чым Узбекістан цікавы Беларусі, паведамляе БЕЛТА.
"Па-першае, Узбекістан - дзяржава, якая размешчана ў сэрцы Цэнтральнай Азіі, і за кошт гэтага якраз-такі ў яго ёсць усе шанцы, каб стаць лакаматывам развіцця рэгіёна. Па-другое, гэта не толькі ёмісты рынак, але і эканоміка, якая найбольш развіваецца на прасторы СНД. Штогадовы прырост ВУП складае каля 5-6 працэнтаў, - адзначыў Антон Дударонак. - Па-трэцяе, зноў жа, зыходзячы з вялікага дэмаграфічнага росту, там вельмі шмат рабочых рук і ёсць патрэбнасць у падрыхтоўцы спецыялістаў і эканамічным развіцці".
Паводле яго слоў, як і ў Беларусі, ва Узбекістане захаваўся прамысловы патэнцыял. "У Беларусі і Узбекістана даволі трывалыя сувязі. Я нават сказаў бы - непарыўная дружба, таму што мы падобныя, узаемадапаўняльныя. Мы гатовы да супрацоўніцтва. У прыватнасці, у нас дастаткова сур'ёзны прырост па мінулым годзе - аб'ём узаемнага гандлю павялічыўся на 12 працэнтаў", - дадаў аналітык.-0-
