Аляксандр Амельянюк
7 кастрычніка, Віцебск /Кар. БЕЛТА/. Спецыялісты і грамадскасць актыўна абмяркоўваюць навацыі законапраекта "Аб змяненні кодэксаў па пытаннях крымінальнай адказнасці", які знаходзіцца на разглядзе ў Палаце прадстаўнікоў. Аб гэтым журналістам на дыялогавай пляцоўцы ў Віцебску паведаміў намеснік старшыні Пастаяннай камісіі Палаты прадстаўнікоў Нацыянальнага сходу Рэспублікі Беларусь па заканадаўстве Аляксандр Амельянюк, перадае карэспандэнт БЕЛТА.
Законапраект прадугледжвае ўзмацненне прафілактычнай работы, дадаў Аляксандр Амельянюк. У прыватнасці, пашырэнне кола асоб, у адносінах да якіх павінны праводзіцца прафілактычныя мерапрыемствы. "Гэта асобы, якія вызваляюцца ад пакарання ўмоўна-датэрмінова, па амністыі, - растлумачыў ён. - За імі павінен ажыццяўляцца кантроль, і акцэнт на прафілактыцы, безумоўна, ёсць."
"Абмеркаванне праходзіць вельмі актыўна. Гэта і словы падтрымкі законапраекта, абазначэнне тых момантаў, якія пакуль засталіся за кадрам, гэта крытыка асобных палажэнняў, асобных норм. Я хацеў бы адзначыць, што законапраект прыняты Палатай прадстаўнікоў у першым чытанні. Гэта значыць, што мы адобрылі канцэпцыю, але да другога чытання мы павінны дапрацаваць гэты законапраект", - сказаў ён.
Аляксандр Амельянюк расказаў, якім чынам будзе адбывацца працэс працаўладкавання асоб, якія вызваліліся з месцаў пазбаўлення волі. "Мы сёння гаворым аб тым, што нашы людзі павінны быць заняты ў эканоміцы. Работа на дзяржаўным прадпрыемстве, заняцце прадпрымальніцкай дзейнасцю, рамеснай, самазанятасць і гэтак далей. Але чалавек павінен быць уключаны ў працу, павінен прыносіць карысць нашаму грамадству. І тым, хто парушыў закон, а тым больш адбываў пакаранне ў месцах пазбаўлення волі, трэба вярнуцца ў грамадства, быць яго паўнацэнным членам. Вядома, далучэнне да працы, мы думаем, - адзін з найбольш эфектыўных шляхоў для такога вяртання", - абазначыў намеснік старшыні Пастаяннай камісіі.
Навацыі законапраекта "Аб змяненні кодэксаў па пытаннях крымінальнай адказнасці" сёння абмеркавалі ў Віцебску на дыялогавай пляцоўцы ў будынку суда Першамайскага раёна. Да дыскусіі далучыліся пракуроры, следчыя, суддзі паўночнага рэгіёна, многія - у рэжыме анлайн. Мерапрыемства арганізавалі ў рамках выканання даручэння Прэзідэнта аб абмеркаванні найбольш вострых палажэнняў законапраекта на месцах.-0-
Фота Аляксея Вронскага
Падпісвайцеся на нас у
