21 верасня, Мінск /Кар. БЕЛТА/. Беларусь, як ніхто іншы, зацікаўлена ў найхутчэйшым мірным урэгуляванні канфлікту ва Украіне. Аб гэтым міністр замежных спраў Беларусі Сяргей Алейнік заявіў на пасяджэнні Савета Бяспекі ААН, перадае карэспандэнт БЕЛТА.
"Знаходзячыся па суседстве з Украінай, Беларусь, як ніхто іншы, зацікаўлена ў найхутчэйшым мірным урэгуляванні гэтага канфлікту. Мы, як суседняя краіна, таксама маем свой глыбокі погляд на гэты канфлікт. Менавіта ў Беларусі былі падпісаны Мінскія дамоўленасці, якія паклалі пачатак мірнаму працэсу па Украіне , і комплекс мер па іх выкананні, які атрымаў адабрэнне Савета Бяспекі ААН. Лічым патрэбным нагадаць аб гэтым, як бы нехта ні хацеў замяць гэту тэму. Доўгачаканы вынік перагавораў у беларускай сталіцы павінен быў стаць асновай мірнага працэсу ва Украіне. Рэалізацыя дамоўленасцей магла вывесці яго на ўстойлівую станоўчую траекторыю. Аднак гэтага не адбылося", - сказаў кіраўнік МЗС.
Сяргей Алейнік адзначыў, што сёння відавочна, чаму гэта не магло адбыцца: "Заходнія калегі красамоўна выказаліся наконт гэтага. Некаторыя адкрыта заявілі, што яны і не планавалі завяршаць гэты канфлікт, а сёння маюць намер ваяваць да апошняга ўкраінца".
Кіраўнік МЗС канстатаваў, што спробы асобных ігракоў перапісаць пад сябе базавыя прынцыпы міжнароднага права і міжнародных адносін пры адначасовым ігнараванні законных інтарэсаў большасці членаў сусветнай супольнасці прывялі да найвышэйшай ступені палярызацыі ў свеце ў цэлым і рэгіёне, дзе знаходзіцца Беларусь.
"Сітуацыя пагаршаецца агрэсіўным процідзеяннем з боку асобных краін, якія прывыклі лічыць сябе цэнтрам чалавечай цывілізацыі, фарміраванню справядлівай, раўнапраўнай поліцэнтрычнай мадэлі свету. Як вынік - у міжнародных адносінах павышаецца роля фактару сілы. Амаль у поўны заняпад прыйшла архітэктура міжнароднай бяспекі, нераспаўсюджвання і кантролю над узбраеннямі", - звярнуў увагу Сяргей Алейнік.
Беларускі бок з вялікай насцярожанасцю назірае несуразмерны рост ваенных патэнцыялаў і гонку ўзбраенняў не толькі ў сваім рэгіёне, але і ў суседніх краінах. Пры гэтым усе ініцыятывы Беларусі па змяншэнні канфрантацыі, аднаўленні даверу і ўмацаванні рэгіянальнай бяспекі, якія прапаноўваліся ў мінулыя гады, засталіся без адказу. "На гэта чамусьці глядзелі пагардліва. У выніку ў Еўрапейскім рэгіёне з новай сілай запалаў канфлікт ва Украіне, а ўвесь свет атрымаў цяжкія наступствы ў выглядзе эканамічных, харчовых і энергетычных крызісаў", - сказаў міністр.
Ён падкрэсліў, што завяршэнне канфлікту непазбежнае, і завершыцца ён за сталом перагавораў. Беларусь вітае з'яўленне ўсё большай колькасці краін, якія прапануюць разумныя мірныя ініцыятывы па вырашэнні сітуацыі ва Украіне. "На заканчэнне хацеў бы зноў пацвердзіць гатоўнасць Беларусі ўнесці свой уклад ва ўрэгуляванне сітуацыі ў мэтах дасягнення доўгатэрміновага і ўстойлівага міру ў рэгіёне, у якім сёння маюць патрэбу ўсе нашы краіны і нашы народы", - рэзюмаваў Сяргей Алейнік.-0-
