ДЗЯРЖОРГАНЫДЗЯРЖОРГАНЫ
Аўторак, 22 верасня 2020
Мінск Ясна +14°C
Усе навіны
Усе навіны
Грамадства
13 жніўня 2020, 14:40

Актыў Мінскай ЦЭЦ-4: супрацоўнікі настроены на мірнае вырашэнне пытанняў, дыялог ідзе канструктыўна

13 жніўня, Мінск /Кар. БЕЛТА/. Супрацоўнікі настроены на мірнае вырашэнне пытанняў, дыялог ідзе канструктыўна. Такое меркаванне журналістам выказаў намеснік начальніка катлатурбіннага цэха нумар 2 па эксплуатацыі ЦЭЦ-4 Кірыл Варнель, перадае карэспандэнт БЕЛТА.

"Усе супрацоўнікі настроены на выкананне задач і на мірнае ўрэгуляванне ўсіх пытанняў, работа вядзецца канструктыўна, заўваг і праблем няма. Рыхтуемся да асенне-зімовага перыяду. Рэжым работы ЦЭЦ кругласутачны, мы забяспечваем цяплом і электраэнергіяй усе слаі насельніцтва. Таму мы не можам сабе дазволіць ніякіх адхіленняў ад рабочага графіка. Усё ў штатным рэжыме і спакойна", - адзначыў Кірыл Варнель.

Згадзіўся з калегам і намеснік галоўнага інжынера па рамонце ЦЭЦ-4 Сяргей Гарбатоўскі. Паводле яго слоў, калегі заняты работай. "Наша ЦЭЦ - гэта буйнейшае прадпрыемства ў энергасістэме Беларусі. У разгары рамонтная кампанія, усе супрацоўнікі ў рабочы час на сваіх месцах, паколькі ў кароткія тэрміны трэба зрабіць вялікі аб'ём работ. Сітуацыя спакойная", - сказаў ён.

Сёння дырэктар філіяла "Мінская ЦЭЦ-4" - РУП "Мінскэнерга" Міхаіл Белы сустрэўся з працоўным калектывам. Яны абмеркавалі вынікі работы за 7 месяцаў бягучага года і планы на астатнюю частку года, настроі ў калектыве.

"Даведзеныя паказчыкі па водпуску цеплавой і электраэнергіі мы практычна выканалі, - растлумачыў кіраўнік ЦЭЦ-4. - Рамонтная кампанія ідзе па графіку, амаль усе работы мы завяршаем, выкананы мерапрыемствы па капітальным будаўніцтве. Адно з асноўных мерапрыемстваў - гэта інтэграцыя БелАЭС у беларускую энергасістэму. Для гэтага цяпер будуюцца і манціруюцца 4 электракатлы. Работы ідуць па графіку, гатоўнасць высокая, завершым у снежні бягучага года".

У цэлым, лічыць ён, на ЦЭЦ калектыў дружны і прафесійны. "Вакантных месцаў няма. Прынялі на работу 27 маладых спецыялістаў, яны ўжо ўліліся ў калектыў, працуем планава. Што датычыцца сацыяльнага пакета, то мы аздараўляем дзяцей, адсочваем усе сітуацыі па хваробах, дапамагаем людзям", - удакладніў Міхаіл Белы.

Ён заклікаў усіх да спакою. "У краіне прайшлі выбары прэзідэнта, агучаны папярэднія вынікі. Усіх заклікаю да спакою. Мы павінны сумесна развіваць тое, што мы пабудавалі, не ўпускаць тэмпы і дабівацца добрых вынікаў", - сказаў ён на заканчэнне.

Таксама кіраўніцтва і актыў Мінскай ЦЭЦ-4 звярнуліся з заявай да работнікаў усёй энергетычнай галіны і прамысловага комплексу краіны: "Мы бачым, што наша грамадства спрабуюць раскалоць, паставіць беларусаў адзін супраць аднаго, пасеяць хаос і разлад на вуліцах гарадоў, у калектывах прадпрыемстваў. Гэта недапушчальна! Кожнаму сёння неабходна цвяроза, без эмоцый ацэньваць сітуацыю, каб не стаць пешкай у чужых руках. Бо размова ідзе пра нашу будучыню. Беларусы зрабілі свой выбар, прагаласавалі за мір, стабільнасць і дабрабыт. Усё, чаго наша краіна дабілася за гады суверэннага развіцця, - вынік нашай з вамі працы. Мы не павінны дапусціць, каб гэта разбурылі дзеля нечага чужароднага, навязанага звонку. Мы ганарымся сваімі дасягненнямі і любім тое, што робім. Мы за стабільную работу прадпрыемстваў, мы за ўпэўненасць у заўтрашнім дні, за моцную і квітнеючую Беларусь!"-0-

Падпісвайцеся на нас у
Twitter
Топ-навіны
З НАМІ НАЙБОЛЬШ ЦІКАВА
Свежыя навіны Беларусі