11 красавіка, Мінск /Кар. БЕЛТА/. Рэспубліканская акцыя "Чысты вадаём" стартуе ў Беларусі, паведамілі БЕЛТА ў РДГА "Беларускае таварыства паляўнічых і рыбаловаў" (БТПР).
Акцыя прадоўжыцца да 19 красавіка. Яна ў першую чаргу накіравана на экалагічнае выхаванне ўсіх слаёў насельніцтва, прыцягненне ўвагі да праблемы забруджвання вадаёмаў, а таксама на прывядзенне ў парадак прыбярэжнай зоны вадаёмаў і вадацёкаў напярэдадні адкрыцця сезона масавага актыўнага адпачынку на прыродзе. "Для ўдзелу ў акцыі дастаткова звярнуцца па месцы жыхарства ў раённую арганізацыйную структуру БТПР, дзе паведамяць аб месцы і часе яе правядзення, а таксама выдадуць усё неабходнае. Можна і самастойна прыехаць у любімыя месцы адпачынку і прыбраць смецце з участка берагавой лініі", - сказалі ў БТПР.
БТПР праводзіць акцыю "Чысты вадаём" з 2014 года. За гэты час супрацоўнікі БТПР сумесна з прадстаўнікамі розных арганізацый і іншымі ўдзельнікамі акцыі прывялі ў парадак больш за 4 тыс. км берагавой лініі вадаёмаў і вадацёкаў. У акцыі ўдзельнічалі больш за 30 тыс. чалавек, было вывезена каля 5 тыс. куб. м смецця.-0-