14 верасня, Мінск /Кар. БЕЛТА/. РНПЦ "Кардыялогія" павінен стаць узорным цэнтрам, дзе будуць створаны ўсе ўмовы для якаснага аказання медыцынскай дапамогі. Аб гэтым заявіў выконваючы абавязкі міністра аховы здароўя Дзмітрый Піневіч, прадстаўляючы сёння калектыву РНПЦ новага дырэктара Наталлю Міцькоўскую, перадае карэспандэнт БЕЛТА.
Дзмітрый Піневіч адзначыў, што ў РНПЦ неабходна ўдасканаліць аказанне тэрапеўтычнай і кардыяхірургічнай меддапамогі. "Мяне не задавальняла загрузка РНПЦ як ва ўмовах COVID-19, так і да пачатку пандэміі і да пачатку рамонтаў. Гэта датычылася тэрапеўтычных ложкаў, інтэрвенцыйнай кардыялогіі, у меншай ступені кардыяхірургіі. Была недазагружанасць. Інтэнсіўнасць работы, калі параўноўваць з еўрапейскімі цэнтрамі, значна ніжэйшая", - сказаў ён.
Выконваючы абавязкі міністра таксама звярнуў увагу, што было некалькі выпадкаў, калі меддапамога ў цэнтры не была аказана належным чынам. "Прынятыя на ўзроўні кіраўніцтва рашэнні не ўстаранілі прычыны, якія прывялі да гэтых парушэнняў, а самі спецыялісты РНПЦ не бачаць шэраг праблем і не вырашаюць тыя сітуацыйныя задачы, якія трэба было даўно вырашыць", - падкрэсліў ён.
Дзмітрый Піневіч выказаўся і наконт навуковай работы ў РНПЦ. Тут, як у вядучай установе ў галіне кардыялогіі, павінны распрацоўвацца пратаколы, стандарты і рэкамендацыі, а ўкараненне высокіх тэхналогій і іх маштабіраванне на рэгіёны павінна быць пастаўлена на сістэмную аснову. "Навука павінна мець вельмі магутны характар, каб сюды сцякаліся гранты, былі публікацыі ў міжнародных выданнях", - дадаў ён.
Што датычыцца паслядыпломнай падрыхтоўкі, то РНПЦ стане базай для праходжання рэзідэнтуры. Гэта новая для краіны форма навучання з'явіцца, як чакаецца, з 2023 года.
"РНПЦ павінен аб'ядноўваць усю кардыялагічную супольнасць. Разам з тым у мяне і ў гэтым плане ёсць шэраг пытанняў, у прыватнасці, па ўзаемадзеянні з клінічнымі цэнтрамі ў Мінску, з Мінскай абласной клінічнай бальніцай", - адзначыў выконваючы абавязкі міністра.
Яшчэ адзін важны аспект, на які звярнуў увагу Дзмітрый Піневіч, - правядзенне закупак. Паводле яго слоў, не ў належнай меры прапрацоўваліся тэхнічныя заданні. "У цэнтры, тым больш з улікам праведзенага будаўніцтва, закупляецца вялікая колькасць медабсталявання і вырабаў медпрызначэння. Мы звярталі ўвагу і своечасова выпраўлялі параметры тэхнічных заданняў з мэтай канкурэнтаздольнасці і змяншэння канчатковага кошту. Аднак і пры гэтым, як паказаў наш аналіз, амаль 30 працэнтаў ад усяго аб'ёму закуплялася ад двух афіліраваных пастаўшчыкоў. І гэта магло стаць значна большай праблемай у далейшым", - адзначыў ён.
Дзмітрый Піневіч заўважыў, што калектыў цэнтра з'яднаны і актыўны. "Я хацеў бы, каб актыўнасць калектыву захавалася і была накіравана на выпрацоўку тых ці іншых рашэнняў у галіне грамадскай аховы здароўя", - сказаў на заканчэнне ён.-0-
