21 красавіка, Мінск /Кар. БЕЛТА/. Напярэдадні Дня Зямлі (22 красавіка) у Мінску аб'явілі пераможцаў конкурсу малюнкаў і відэаролікаў сярод вучняў устаноў адукацыі, якія рэалізуюць адукацыйны праект "Зялёныя школы" ў Беларусі, паведамілі БЕЛТА ў прадстаўніцтве ПРААН у Беларусі.
Тэма конкурсу супадае з тэмай Дня Зямлі гэтага года - "Адновім нашу Зямлю!". Конкурс праведзены ў рамках праекта "Уключэнне грамадскасці ў экалагічны маніторынг і паляпшэнне кіравання аховай навакольнага асяроддзя на мясцовым узроўні", які рэалізуецца ПРААН у партнёрстве з Міністэрствам прыродных рэсурсаў і аховы навакольнага асяроддзя Беларусі і фінансуецца Еўрапейскім саюзам.
"Вачамі дзяцей мы ўбачылі тыя надзённыя пытанні, якія хвалююць маладое пакаленне і якія мы павінны вырашыць для нашай здаровай будучыні, будучыні роднай зямлі і планеты, - адзначыў у прывітальным слове да ўдзельнікаў конкурсу першы намеснік міністра прыродных рэсурсаў і аховы навакольнага асяроддзя Баляслаў Пірштук. - У многіх работах прадстаўлены шляхі вырашэння гэтых экалагічных задач. Я рады, што сёння моладзь клапоціцца аб сваёй будучыні не менш за эколагаў".
Усяго ў конкурсе ўдзельнічалі 294 установы адукацыі ў катэгорыі "малюнак" (прадстаўлена больш за 1 тыс. работ) і 128 устаноў адукацыі - у катэгорыі "відэаролік" (усяго 206 работ). Удзельнікі конкурсу навучаюцца па праграме "зялёныя школы" , і атрыманыя экалагічныя веды школьнікі змаглі перадаць у сваёй творчасці.
У катэгорыі малюнка сярод дзяцей 5-6 гадоў перамогу атрымаў Ілья Матылевіч з работай "Ля кармушкі" (дашкольны цэнтр развіцця дзіцяці нумар 2 Ліды), сярод дзяцей 7-10 гадоў - Максім Жураўко (СШ нумар 2 Новалукомля), 11-13 гадоў - Настасся Аляхновіч з работай "Юныя захавальнікі Ельні" (Германавіцкі дзіцячы сад - сярэдняя школа Шаркаўшчынскага раёна), 14-17 гадоў - Юлія Марозава з работай "Маленькая балотная птушка - знікаючы ў свеце від" (СШ нумар 1 Пінска).
У катэгорыі відэаролікаў сярод дзяцей 11-13 гадоў лепшым названы ролік "Правядзі час з карысцю!" Сафіі Маталянец (Брэсцкі абласны цэнтр турызму і краязнаўства дзяцей і моладзі), сярод дзяцей 14-17 гадоў перамогу атрымаў Дзяніс Васеха з работай "Выконвай правілы энергазберажэння" (гімназія нумар 7 Віцебска).
"У Дзень Зямлі мы прадаўжаем змагацца з пандэміяй, беспрэцэдэнтнай у нашым жыцці і патрабуючай глабальнага адказу. У гэтым кантэксце пытанні змянення клімату, аховы прыроды і біяразнастайнасці могуць падацца не такімі тэрміновымі. Аднак крызіс нясе ў сабе і магчымасці выкарыстоўваць новыя веды, практыкі і тэхналогіі для выратавання планеты і людзей, зрабіць эканоміку больш зялёнай і ўстойлівай, а таксама развіваць экалагічную адукацыю сярод людзей усіх узростаў. Я з задавальненнем адзначаю, што гэтыя веды і рашэнні ў тым ліку знайшлі адлюстраванне ў малюнках і відэароліках, прадстаўленых на конкурс", - падкрэсліла пастаянны прадстаўнік праграмы развіцця ААН у Рэспубліцы Беларусь Аляксандра Салаўёва.
Адукацыйную праграму "Зялёныя школы" пачалі адаптаваць у Беларусі пры падтрымцы ПРААН і з фінансаваннем Еўрапейскага саюза з 2010 года. З таго часу кожны год да яе далучаецца ўсё больш устаноў адукацыі. Сёння ўжо больш за 400 адукацыйных устаноў у рамках праграмы вывучаюць пытанні біяразнастайнасці, энергазберажэння, водазберажэння, абыходжання з адходамі, якасці атмасфернага паветра і арганізуюць інфармацыйна-экалагічныя мерапрыемствы.-0-
