Абавязковае абазначэнне аўтамабіляў каршэрынгу плануюць увесці ў Беларусі

15 ліпеня, Мінск /Кар. БЕЛТА/. Абавязковае абазначэнне аўтамабіляў каршэрынгу плануюць увесці ў Беларусі, паведаміў журналістам начальнік упраўлення ДАІ ГУУС Мінгарвыканкама Сяргей Бабіч, перадае карэспандэнт БЕЛТА.

Сёння прайшло пашыранае пасяджэнне Пастаяннай камісіі па прамысловасці, энергетыцы, транспарце, сувязі і лічбавым развіцці Палаты прадстаўнікоў па пытанні прававога рэгулявання прадастаўлення паслуг кароткатэрміновай арэнды транспартных сродкаў (каршэрынгу). У ходзе семінара-нарады па актуальных пытаннях забеспячэння бяспекі дарожнага руху ў Рэспубліцы Беларусь, праведзенага 25 чэрвеня ў Палаце прадстаўнікоў, былі выяўлены прабелы ў прававым рэгуляванні пры прадастаўленні паслуг кароткатэрміновай арэнды транспартных сродкаў, так званага каршэрынгу. Гэта датычыцца і шэрынгу сродкаў персанальнай мабільнасці - веласіпедаў і электрасамакатаў.

Цяпер у Рэспубліцы Беларусь адсутнічае прававы акт, які рэгламентуе парадак узаемадзеяння каршэрынгавых арганізацый і карыстальнікаў, у сувязі з чым іх адносіны рэгулююцца палажэннямі Грамадзянскага кодэкса, якія не ў поўнай меры адлюстроўваюць спецыфіку так званай памінутнай арэнды аўтамабіляў. У сувязі з гэтым кожная шэрынгавая кампанія прытрымліваецца сваёй палітыкі пры ўзаемадзеянні з грамадзянамі. Звычайнаму карыстальніку складана разабрацца ва ўсіх тонкасцях і адрозненнях сістэм работы такіх арганізацый, варыятыўнасці прадугледжаных штрафаў і іншых спагнанняў за неналежнае карыстанне аўтамабілем.

"Цяпер вельмі шырока развіты такі від аказання паслуг, як шэрынг аўтамабіляў і самакатаў, якія не ў поўнай меры падпадаюць пад рэгуляванне дзеючага заканадаўства, што патрабуе карэкціроўкі. Гэта павінна датычыцца як парадку заключэння дагавораў, так і кантролю за іх выкарыстаннем і ў цэлым забеспячэння правіл бяспекі дарожнага руху, - расказаў Сяргей Бабіч. - Гэта закране і непасрэдна абазначэнне гэтых транспартных сродкаў, для таго каб іх можна было вызначаць у патоку, а таксама прававое рэгуляванне і адказнасць тых службовых асоб, якія прадастаўляюць паслугу па гэтым напрамку".

Паводле яго слоў, гэта абумоўлена вялікай колькасцю выяўленых парушэнняў сярод карыстальнікаў шэрынгу. "Напрыклад, у частцы кіравання транспартным сродкам у стане алкагольнага ап'янення. Каля 10 працэнтаў толькі за бягучы год ад усіх выяўленых парушальнікаў у сферы кіравання транспартным сродкам у стане алкагольнага ап'янення склалі менавіта гэтыя ўладальнікі. Гэта і кіраванне транспартным сродкам шэрынгавых кампаній асобамі, не маючымі права кіравання. У тым ліку нават ёсць такія факты, якія дапушчаны паўторна", - адзначыў начальнік упраўлення.

"У адпаведнасці з правіламі дарожнага руху нанясенне якіх-небудзь наклеек на транспартны сродак забаронена. Аднак мы бачым, што транспартныя сродкі, якія абазначаны менавіта пэўнай колераграфічнай афарбоўкай, паказваюць іх прыналежнасць да пэўнай шэрынгавай кампаніі. Гэта дазваляе супрацоўнікам ДПС у ходзе нясення службы вычляняць іх з патоку, спыняць, правяраць парадак іх выкарыстання, стан вадзіцеля і наяўнасць вадзіцельскага пасведчання. І гэта ў значнай меры аблегчыць работу ў частцы забеспячэння бяспекі дарожнага руху", - удакладніў Сяргей Бабіч.-0-