26 верасня, Мінск /Кар. БЕЛТА/. Абавязацельствы, прадугледжаныя дагаворам аб добраахвотным страхаванні дадатковай накапляльнай пенсіі, будуць выкананы ў любым выпадку, заявіў журналістам гендырэктар дзяржаўнага прадпрыемства "Стравіта" Сяргей Андрыевіч, перадае карэспандэнт БЕЛТА.
"Мы прапрацоўваем вельмі сур'ёзна гэта пытанне з нашымі банкамі. І пад гэты ўказ (нумар 367 "Аб добраахвотным страхаванні дадатковай накапляльнай пенсіі". - Заўвага БЕЛТА) будуць адкрыты пэўныя дэпазіты з умовамі, якія дазволяць нам забяспечваць тую даходнасць, якая сёння прадугледжаная ўказам. На доўгіх грошах там зусім іншыя стаўкі. Мы будзем у любым выпадку выконваць тыя нормы ўказа, якія прадугледжаны", - адзначыў Сяргей Андрыевіч.
Паводле яго слоў, для гарантавання выплат, выканання абавязацельстваў прадоўжыцца фарміраванне страхавых рэзерваў, гарантыйнага фонду. Больш таго, выплаты па дагаворах страхавання, заключаных з дзяржаўнай страхавой арганізацыяй, гарантуюцца дзяржавай, падкрэсліў гендырэктар.
Сяргей Андрыевіч таксама расказаў, як будуць працаваць грошы, якія грамадзяне разам з работадаўцамі пералічаць у "Стравіту". Ён адзначыў, што сфарміраваныя рэзервы будуць размяшчацца ў фінансавыя інструменты - дзяржаўныя каштоўныя паперы, аблігацыі, а таксама ўклады ў дзяржаўных банках.
"Адпаведна, грашовыя сродкі пастаянна будуць працаваць у эканоміцы, будзе атрымлівацца даходнасць і размяркоўвацца паміж асабовымі рахункамі нашых застрахаваных грамадзян. Указам вызначана гарантаваная даходнасць у памеры стаўкі рэфінансавання. Калі яна будзе мяняцца, у людзей будзе мяняцца і іх гарантаваная даходнасць па кожным асабовым рахунку", - растлумачыў Сяргей Андрыевіч. Акрамя таго, не менш за 50 працэнтаў дадатковага даходу ад размяшчэння грашовых сродкаў (у выпадку яго атрымання) таксама будзе размяркоўвацца паміж застрахаванымі.
Новы механізм стане добрым інструментам, які дазволіць грамадзяніну самастойна накопліваць свае грашовыя сродкі, упэўнены Сяргей Андрыевіч. Вялікай перавагай перад салідарнай пенсійнай сістэмай з'яўляецца тое, што пенсія спадчынная. Калі грамадзянін да дасягнення агульнаўстаноўленага пенсійнага ўзросту памірае, усе накопленыя на яго рахунку грашовыя сродкі атрымліваюць спадчыннікі.
З 1 кастрычніка на афіцыйным сайце "Стравіты" будзе ўведзены ў эксплуатацыю асабісты кабінет карыстальніка, атрымаць доступ да якога можна будзе, прайшоўшы рэгістрацыю. У хуткім часе там з'явіцца магчымасць заключэння дагавора анлайн. "Адказаўшы на шэраг пытанняў, можна будзе атрымаць на электронную пошту дагавор страхавання ў электронным выглядзе. Для тых, хто хоча атрымаць бланк страхавога пасведчання, трэба будзе наведаць офіс нашага прадпрыемства. Страхавыя пасведчанні выраблены і знаходзяцца ва ўсіх рэгіёнах. Мы гатовы да заключэння дагавораў з 1 кастрычніка", - адзначыў Сяргей Андрыевіч.
Намеснік начальніка галоўнага ўпраўлення страхавога нагляду Міністэрства фінансаў Наталля Новікава звярнула ўвагу: пасля заключэння дагавора страхавання, каб сістэма пачала працаваць, неабходна паведаміць свайму работадаўцу. На рабоце неабходна напісаць заяву аб утрыманні з заработнай платы страхавога ўзносу, які будзе выплачвацца за кошт сродкаў грамадзяніна, і прадставіць копію страхавога пасведчання з прад'яўленнем яго арыгінала. Пакуль работнік гэтага не зробіць, сістэма не пачне працаваць. Пры змене работы ў абавязковым парадку работнік павінен свайму новаму наймальніку паведаміць аб тым, што ён удзельнічае ў сістэме дадатковай накапляльнай пенсіі.
У адпаведнасці з указам нумар 367 "Аб добраахвотным страхаванні дадатковай накапляльнай пенсіі" з 1 кастрычніка 2022 года ў краіне ўводзіцца добраахвотнае страхаванне дадатковай накапляльнай пенсіі з фінансавай падтрымкай дзяржавы. З гэтай даты грамадзянін зможа заключыць дагавор, звярнуўшыся або ў офіс "Стравіты", або праз асабісты кабінет карыстальніка афіцыйнага сайта гэтага дзяржпрадпрыемства.-0-
