5 чэрвеня, Мінск /Кар. БЕЛТА/. У новым комплексным прагнозе навукова-тэхнічнага прагрэсу Беларусі (КП НТП) вызначылі пералік аб'ектаў прагназавання. Размова аб гэтым ішла на пасяджэнні часовай міжведамаснай рабочай групы па распрацоўцы комплекснага прагнозу навукова-тэхнічнага прагрэсу Беларусі на 2026-2030 гады і на перыяд да 2045 года, паведамілі БЕЛТА ў Дзяржаўным камітэце па навуцы і тэхналогіях.
Па выніках абмеркавання члены рабочай групы ў цэлым адобрылі вынікі першага этапу распрацоўкі: пералік аб'ектаў прагназавання, пералік іх параметраў, метадычныя падыходы да фарміравання прыярытэтных напрамкаў навуковай, навукова-тэхнічнай і інавацыйнай дзейнасці, а таксама да фарміравання комплексных праектаў будучага.
Як адзначана на пасяджэнні, комплексны прагноз навукова-тэхнічнага прагрэсу фарміруецца па актуалізаванай методыцы папярэдняга для 15 галін эканомікі па 22 відах эканамічнай дзейнасці з улікам іх укладу ў ВУП.
Для вызначэння пераліку аб'ектаў прагназавання створана 10 экспертных груп.
На першым этапе распрацоўкі экспертнай супольнасцю сфарміраваны пералік аб'ектаў прагназавання (тэхналогіі, тавары або паслугі) з 872 аб'ектаў, якія могуць стаць драйверамі эканамічнага росту на прагназуемы перыяд. На другім этапе фарміравання КП НТП для кожнага аб'екта прагназавання будуць вызначаны значэнні шэрага параметраў.
Па даручэнні ўрада міжведамаснай рабочай групай разгледжаны таксама праект Канцэпцыі нацыянальнага суверэнітэту ў сферы лічбавага развіцця для яе выкарыстання ў рамках КП НТП.-0-
