12 красавіка, Мінск /Кар. БЕЛТА/. 12 красавіка па ініцыятыве Генеральнай асамблеі ААН абвешчана Міжнародным днём палёту чалавека ў космас. Менавіта ў гэты дзень Юрый Гагарын зрабіў першы ў гісторыі чалавецтва касмічны палёт.
З першых дзён асваення космасу Беларусь не засталася ўбаку. Першыя распрацоўкі па касмічнай тэматыцы ў рэспубліцы адносяцца да пачатку 1960-х гадоў. У навуковых інстытутах і на прамысловых прадпрыемствах вяліся распрацоўка і стварэнне найноўшых аптычных прыбораў, наземных сістэм кіравання запускам ракет, праграм па апрацоўцы касмічных фатаграфій. У савецкі перыяд у космасе пабывалі два ўраджэнцы Беларусі - Уладзімір Кавалёнак і Пётр Клімук.
Беларускі касманаўт двойчы Герой Савецкага Саюза Пётр Клімук у снежні 1973 года прапрацаваў тыдзень на караблі "Саюз-13", а потым зноў адправіўся ў космас у маі 1975-га і правёў на арбіце 63 дні.
Яшчэ адзін беларус, які пакарыў космас, - Уладзімір Кавалёнак. Яму не было яшчэ і дваццаці двух гадоў, калі ён прыбыў у авіяцыйнае падраздзяленне. Уладзімір Кавалёнак пабываў на арбіце тры разы і ў сукупнасці 216 сутак: у 1977, 1978 і 1981 гадах.
Усяго ў гісторыі касманаўтыкі тры беларусы змаглі злятаць у космас. Трэцім у 2012 годзе ў якасці камандзіра карабля "Саюз ТМА-06М" стаў Алег Навіцкі.
Стратэгічна важным для Беларусі стаў запуск 22 ліпеня 2012 года з касмадрома Байканур у Казахстане ўласнага спадарожніка дыстанцыйнага зандзіравання Зямлі (БКА). Ён быў запушчаны ў космас у кластары з пяці касмічных апаратаў - разам з расійскім касмічным апаратам "Канопус-В", расійскім МКА-ФКІ ("Зонд-ПП"), нямецкім TET-1 і канадскім ADS-1B.
Рашэнне аб стварэнні касмічнага апарата (БКА быў накіраваны на дапамогу МНС, патрэб сельскай і лясной гаспадарак) і на яго аснове Беларускай касмічнай сістэмы дыстанцыйнага зандзіравання Зямлі было прынята Прэзідэнтам у 2003 годзе. З запускам уласнага спадарожніка Беларусь атрымала статус касмічнай дзяржавы. На 68-й сесіі Генеральнай асамблеі ААН у лістападзе 2013 года было прынята рашэнне аб уключэнні Беларусі ў члены Камітэта ААН па выкарыстанні касмічнай прасторы ў мірных мэтах.
А 15 студзеня 2016 года з кітайскага касмадрома "Січан" запушчаны беларускі тэлекамунікацыйны спадарожнік "Белінтэрсат-1". Запуск адбыўся ў 19.57 па мінскім часе з дапамогай ракеты-носьбіта "Вялікі паход-3Б".
Сёння ў Беларусі сфарміравана ўся неабходная інфраструктура для прыёму, перадачы і апрацоўкі касмічнай інфармацыі. На калязямной арбіце працуюць Беларускі касмічны апарат дыстанцыйнага зандзіравання Зямлі, спадарожнік сувязі "Белінтэрсат-1" і адукацыйны нанаспадарожнік BSU Sat-1 Белдзяржуніверсітэта.
Цяпер Беларусь рыхтуецца да запуску яшчэ аднаго спадарожніка. Новы расійска-беларускі апарат знаходзіцца ў стадыі распрацоўкі.
