Версія для друку:
+
Карцінкі
Друк
Навіны Беларусі

У Мінску ўзнагародзілі пераможцаў конкурсу на лепшае асвятленне ў СМІ тэмы развіцця УС

Грамадства 13.02.2018 | 19:55
Карэспандэнт БЕЛТА Святлана Пекар, галоўны рэдактар газеты "7 дней" Наталля Філіпоўская, намеснік галоўнага рэдактара рэдакцыі візуальнай інфармацыі БЕЛТА Уладзімір Іваніцкі.
Карэспандэнт БЕЛТА Святлана Пекар, галоўны рэдактар газеты "7 дней" Наталля Філіпоўская, намеснік галоўнага рэдактара рэдакцыі візуальнай інфармацыі БЕЛТА Уладзімір Іваніцкі.

13 лютага, Мінск /Кар. БЕЛТА/. У Мінску ўзнагародзілі пераможцаў штогадовага творчага конкурсу на лепшае асвятленне ў СМІ пытанняў будаўніцтва і развіцця Узброеных Сіл Беларусі, а таксама патрыятычнага выхавання насельніцтва, перадае карэспандэнт БЕЛТА.

Сярод пераможцаў творчага конкурсу супрацоўнікі БЕЛТА. Калектыў агенцтва атрымаў дыплом першай ступені ў намінацыі "Цеснае і плённае супрацоўніцтва". Таксама першая прэмія ў намінацыі "У рэжыме рэальнага часу" была ўручана карэспандэнту Святлане Пекар. Фатограф агенцтва Раміль Насібулін атрымаў перамогу ў намінацыі "Спыніся, імгненне". Дыплома другой ступені і другой прэміі быў удастоены калектыў рэдакцыі візуальнай інфармацыі БЕЛТА за цыкл фотарэпартажаў, якія ілюструюць жыццё і дзейнасць органаў ваеннага кіраўніцтва, злучэнняў і воінскіх часцей УС, ваенных навучальных устаноў і арганізацый Міністэрства абароны.

У цырымоніі ўзнагароджання прынялі ўдзел міністр абароны генерал-лейтэнант Андрэй Раўкоў, міністр інфармацыі Аляксандр Карлюкевіч, памочнік міністра абароны па ідэалагічнай рабоце ва УС - начальнік галоўнага ўпраўлення ідэалагічнай работы Мінабароны генерал-маёр Аляксандр Гура.

Андрэй Раўкоў адзначыў сімвалічнасць падвядзення вынікаў напярэдадні Дня абаронцаў Айчыны і 100-годдзя Узброеных Сіл Беларусі. "Гэта свята сімвалізуе ўсенародны характар абароны Радзімы, у аснове якога ляжыць патрыятызм беларускага народа. Менавіта таму ў тэматыцы нашага конкурсу прысутнічаюць два ўзаемазвязаныя канцэптуальныя паняцці - ваеннае будаўніцтва і патрыятычнае выхаванне. Гэта два непарыўна звязаныя напрамкі дзяржпалітыкі, паспяховая рэалізацыя якіх з'яўляецца гарантам стабільнасці, міру і стваральнай працы на беларускай зямлі", - сказаў ён.

Кіраўнік ваеннага ведамства асобна падкрэсліў высокую эфектыўнасць супрацоўніцтва Узброеных Сіл і СМІ. "Прыкладам таго служыць асвятленне сумеснага стратэгічнага вучэння "Захад-2017", якое мы праводзілі ў верасні мінулага года. Пасля яго завяршэння кіраўнік дзяржавы даў высокую ацэнку рабоце сродкаў масавай інфармацыі. У тым ліку аб гэтым ён гаварыў і на сённяшнім пасяджэнні Савета бяспекі. Акрамя таго, там быў абазначаны шэраг праблем і недахопаў, якія ў нас з вамі яшчэ ёсць", - праінфармаваў Андрэй Раўкоў.

У сярэднім штогод пытанням будаўніцтва і развіцця Узброеных Сіл прысвячаецца больш як 3 тыс. публікацый у друкаваных СМІ, каля 150 гадзін тэле- і 80 гадзін радыёэфіру. Важнасць гэтай работы адзначыў міністр інфармацыі. "Тыя старонкі газет, якія прысвечаны розным аспектам жыццядзейнасці Узброеных Сіл, чытаюць ва ўсёй краіне. Тыя радыётэлевізійныя праграмы, якія маюць добрыя шматгадовыя традыцыі, з якіх чытач, глядач і радыёслухач даведваюцца пра сённяшнія падзеі, пра тыя подзвігі, якія здзяйсняюць сёння салдаты, безумоўна, прыцягваюць народ нашай краіны", - канстатаваў Аляксандр Карлюкевіч.-0-

Вы можаце знайсці гэту старонку па наступным адрасе:
https://blr.belta.by/society/view/u-minsku-uznagarodzili-peramozhtsau-konkursu-na-lepshae-asvjatlenne-u-smi-temy-razvitstsja-us-66194-2018/
БЕЛТА - Навiны Беларусi, © Аўтарскае права належыць БЕЛТА, 1999-2018 г. 
Гіперспасылка на крыніцу абавязковая. Умовы выкарыстання матэрыялаў.
Тэхнiчнае забеспячэнне - БЕЛТА