Версія для друку:
+
Карцінкі
Друк

Навіны Беларусі

Беларусь гатова аднавіць транзіт нафты пасля атрымання пацвярджэнняў ад Украіны і Польшчы

Эканоміка 20.05.2019 | 13:43
Фота з архіва
Фота з архіва

20 мая, Мінск /Кар. БЕЛТА/. Беларусь гатова аднавіць транзіт расійскай нафты па трубаправодзе "Дружба" ў напрамку Украіны і Польшчы пасля атрымання ад іх адпаведных узгадненняў, паведамілі карэспандэнту БЕЛТА ў канцэрне "Белнафтахім".

"Беларускі бок гатовы аднавіць транзіт нафты, чакаем пацвярджэння ад украінскага і польскага бакоў", - сказалі ў канцэрне.

Раней паведамлялася, што транзітнае прапампоўванне ў напрамку Украіны прыпынена з-за адсутнасці свабодных рэзервуараў на ўкраінскай тэрыторыі для адпампоўвання бруднай нафты, што знаходзіцца ў трубаправодзе. Транзіт нафты ў бок Польшчы не вядзецца, 24 красавіка ён спынены на нявызначаны тэрмін.

Канцэрн "Белнафтахім" 19 красавіка заявіў аб рэзкім пагаршэнні якасці расійскай нафты Urals, што паступае транзітам ва ўчастак магістральнага нафтаправода ААТ "Гомельтранснафта Дружба". Колькасць хлорарганічных злучэнняў у нафце перасягала ў дзясяткі разоў максімальныя значэнні па стандарце. Сістэма нафтаправода "Дружба" забяспечвае пастаўкі нафты на беларускія НПЗ і транзіт нафты ў Еўропу праз Беларусь па двух напрамках - цераз Польшчу і Украіну.

Сёння кіраўнік канцэрна "Белнафтахім" правядзе ў Маскве перагаворы па нафтавай тэматыцы ў Мінэнерга РФ.-0-

Вы можаце знайсці гэту старонку па наступным адрасе:
https://blr.belta.by/economics/view/belarus-gatova-adnavits-tranzit-nafty-paslja-atrymannja-patsvjardzhennjau-ad-ukrainy-i-polshchy-78188-2019/
БЕЛТА - Навiны Беларусi, © Аўтарскае права належыць БЕЛТА, 1999-2019 г. 
Гіперспасылка на крыніцу абавязковая. Умовы выкарыстання матэрыялаў.
Тэхнiчнае забеспячэнне - БЕЛТА