22 лістапада, Мінск /Кар. БЕЛТА/. Прэзідэнт Беларусі Аляксандр Лукашэнка пракаменціраваў паведамленні аб масавых пратэстах у краіне ў мінулым годзе. Адпаведныя заявы кіраўнік дзяржавы зрабіў у інтэрв'ю брытанскай медыякампаніі Бі-бі-сі, паведамляе БЕЛТА.
Журналіст Бі-бі-сі спытаў у кіраўніка дзяржавы, ці лічыць ён на самай справе, што за яго прагаласавала больш за 80 працэнтаў выбаршчыкаў, і калі гэта так - чаму тады на вуліцы выйшла такая вялікая, паводле яго слоў, колькасць пратэстуючых - 200 тыс. грамадзян.
"Вы назвалі лічбу 80 працэнтаў. Гэта не я лічбу назваў, а законная Цэнтральная выбарчая камісія. Гэта факт, законны факт. Вы гаворыце, "натоўпы выйшлі" і іншае. Стыў, 25 гадоў натоўпамі ходзяць па Мінску пасля выбараў вашы прыхільнікі ў Беларусі. У 1990-я гады яны нават машыны ДАІ пераварочвалі. Прыходзілі з фашысцкімі сцягамі. І кожныя выбары. У 2010 годзе яны разбілі палатачны горад у цэнтры Мінска. Гэта было пастаянна. Толькі ў гэтым годзе гэта было больш падрыхтавана з вашага боку вамі: фондамі нямецкімі, англійскімі, амерыканскімі фондамі. Грошы ўкінулі, людзей тут на фоне пандэміі падрыхтавалі. І гэты працэс заняў крыху большы прамежак. Таму не натоўпы хадзілі тут, а максімум, калі сабралі з усёй краіны, на піку было 46 тысяч 700 або 600 чалавек тут, у Мінску", - звярнуў увагу Прэзідэнт.
Аляксандр Лукашэнка прапанаваў супаставіць гэтыя факты, няхай нават зыходзячы з таго, што на вуліцы выйшла пратэставаць 200 тыс. чалавек - гэта ўсяго толькі крыху больш за 2 працэнты ад усіх жыхароў Беларусі. "За мяне не прагаласавала на тых выбарах, па-мойму, 650 або 670 тысяч. Але гэта ўсяго толькі 13 працэнтаў або 15 працэнтаў. Вось адсюль і 80 працэнтаў. Вы называеце 200 тысяч, я называю 600. Дык гэта 600, а не 10 мільёнаў. Таму вы крыху з арыфметыкай разбярыцеся", - прапанаваў журналісту кіраўнік дзяржавы.
"Колькі ў нас людзей прыходзіла на мітынгі і да гэтага часу ездзяць з дзяржаўнымі сцягамі. І людзі ўсё больш і больш разумеюць. І сёння іх ужо не 80 працэнтаў. Сёння іх 87 працэнтаў, а можа, і 90 працэнтаў", - дадаў Прэзідэнт.-0-
