09 красавіка 2025, 16:37

"Вельмі добры мёд". Лукашэнка перадаў хакеістам "Дынама-Мінск" падарункі з пачастункамі

9 красавіка, Мінск /Кар. БЕЛТА/. Прэзідэнт Беларусі Аляксандр Лукашэнка прывёз хакеістам "Дынама-Мінск" падарункі з пачастункамі, перадае карэспандэнт БЕЛТА.

Сёння Прэзідэнт прыехаў на трэніроўку "Дынама-Мінск" і падтрымаў нашых хакеістаў. "Зубры", якія ўпершыню ў гісторыі прабіліся ў чвэрцьфінал Кубка Гагарына, 12 і 14 красавіка згуляюць у Чэлябінску з "Трактарам". Пасля размовы з хакеістамі Прэзідэнт правёў імправізаваную дуэль з варатаром "Дынама-Мінск" Васілём Дземчанкам, якому закінуў некалькі шайбаў. А пасля размінкі паназіраў за трэніроўкай хакеістаў.

Аляксандр Лукашэнка прыехаў да хакеістаў не з пустымі рукамі і перадаў ім падарункі. Каманда атрымала ад Прэзідэнта хлеб - віцебскі і магілёўскі. Кіраўнік дзяржавы расказаў, што некалі аб'явіў конкурс на лепшы хлеб у Беларусі. Перамог магілёўскі, з чым не згадзіліся хлебаробы з Віцебска. Тады яны вырабілі на конкурс свой чорны хлеб. Менавіта гэты хлеб перадаў Прэзідэнт хакеістам. Да яго дадавалася і сала.

У падарунках быў і мёд з Таджыкістана. "Вельмі добры мёд - раніцай, перад трэніроўкай... На трэнеру паспрабуйце! - жартам сказаў Прэзідэнт. - Горны таджыкскі мёд вельмі добры".

"Яшчэ раз, хлопцы, дзякуй! Не забудзьце: сала пасля трэніроўкі", - дадаў кіраўнік дзяржавы. І даў параду ігракам ніколі не спяшацца. Гэта датычыцца ў тым ліку і жадання прабіцца ў НХЛ. Аляксандр Лукашэнка адзначыў, што потым, калі ўзнікне жаданне вярнуцца назад, гэта можа быць не так проста.

Каманда таксама перадала Аляксандру Лукашэнку падарунак. Прэзідэнту дасталася сувенірнае джэрсі з аўтографам ігракоў мінскага "Дынама". Аляксандр Лукашэнка паабяцаў, што асабіста павесіць джэрсі ў Палацы Незалежнасці, калі "зубры" пройдуць "Трактар" і праб'юцца ў наступны раўнд плэй-оф.-0-