3 студзеня, Мінск /Кар. БЕЛТА/. Прэзідэнт Беларусі Аляксандр Лукашэнка падпісаў закон, які карэкціруе законы па пытаннях дзейнасці рэлігійных арганізацый. Аб гэтым БЕЛТА паведамілі ў прэс-службе кіраўніка дзяржавы.
Дакумент замацоўвае сучасныя падыходы ва ўзаемаадносінах дзяржавы з рэлігійнымі арганізацыямі. У прыватнасці, прадугледжваецца павышэнне патрабаванняў для стварэння рэспубліканскага рэлігійнага аб'яднання: наяўнасць у яго складзе рэлігійных абшчын, якія дзейнічаюць ва ўсіх абласцях і ў Мінску.
Павялічана таксама колькасць рэлігійных абшчын, неабходных для стварэння рэспубліканскага аб'яднання. Пры гэтым хаця б адна з іх павінна ажыццяўляць дзейнасць на працягу не менш як 30 гадоў.
Прадугледжана магчымасць стварэння рэлігійнымі арганізацыямі структур па аказанні сацыяльных паслуг пажылым грамадзянам, інвалідам, сацыяльнай рэабілітацыі залежных ад псіхаактыўных рэчываў, а таксама дзіцячых дамоў пры манастырах па ўзгадненні з абласным (Мінскім гарадскім) выканаўчым камітэтам.
На працягу года пасля ўступлення ў сілу закона павінна прайсці перарэгістрацыя рэлігійных арганізацый.-0-