26 студзеня, Мінск /Кар. БЕЛТА/. У Беларусі прапануецца стварыць адукацыйны цэнтр па падрыхтоўцы кадраў перспектыўных напрамкаў. Гэта стала тэмай нарады ў Прэзідэнта Беларусі Аляксандра Лукашэнкі, перадае карэспандэнт БЕЛТА.
"Нам трэба вызначыцца, што гэта за перспектыўныя напрамкі, без якіх ні адна дзяржава абысціся не можа", - адзначыў кіраўнік дзяржавы.
Міністр адукацыі Андрэй Іванец далажыў, што прапануюцца тыя напрамкі, якія патрэбны краіне. У іх ліку авіябудаванне, лічбавыя тэхналогіі, біятэхналогіі і шэраг іншых сфер для падрыхтоўкі кадраў па інжынерных спецыяльнасцях. Адпаведныя школы і патэнцыял у Беларусі ёсць на базе чатырох ВНУ: БДУ, БНТУ, БДУІР і БДТУ.
Цяпер на базе шэрага ВНУ ўжо рэалізуюцца эксперыментальныя праграмы падрыхтоўкі, але, як адзначыў міністр, засвоіць іх змогуць не ўсе студэнты. "Гэта не значыць, што мы іх дрэнна рыхтуем. Мы іх рыхтуем абсалютна для ўсіх галін нашай эканомікі. Але нам патрэбны своеасаблівы спецназ. І ў дадзеным выпадку гэта (стварэнне новага цэнтра. - Заўвага БЕЛТА) фактычна будзе прадаўжэннем траекторыі Нацыянальнага дзіцячага тэхнапарка, дзе мы бачым, што канцэнтраванне такіх навучэнцаў было абсалютна апраўданым", - сказаў Андрэй Іванец.
Кіраўнік дзяржавы на нарадзе тым не менш паставіў шэраг пытанняў, ці трэба ствараць асобны цэнтр, каб развіваць гэтыя напрамкі. Паколькі іх можна развіваць і на базе традыцыйных цэнтраў, пачынаючы ад ВНУ і заканчваючы Акадэміяй навук. "Месца хапае. Былі б людзі, якія маглі б гэта рухаць", - заўважыў ён.
Аляксандр Лукашэнка таксама пацікавіўся, што зроблена ўжо ў арганізацыі эксперыментальнай падрыхтоўкі і яе маштабаванні, як яна будзе ўзгоднена з праграмамі гэтага адукацыйнага цэнтра. Прэзідэнт ставіць пытанне, навошта частку эксперыментальных праграм, якія ўжо рэалізуюцца, прапануецца пераносіць з вядучых ВНУ ў гэты новы цэнтр. "Яны што, не спраўляюцца, не хапае нечага? - спытаў Прэзідэнт. - Хачу, каб усе разумелі: мы не можам сабе дазволіць агаліць кадравы склад вядучых устаноў вышэйшай адукацыі краіны. У нейкай ступені гэта можа адбыцца. Зніжэнне якасці навучання недапушчальна. Ад гэтага залежыць міжнародны прэстыж нашай вышэйшай адукацыі і экспарт адукацыйных паслуг".
Кіраўнік дзяржавы таксама ставіць пытанне, у чым будзе ўнікальнасць адбору і падрыхтоўкі маладых спецыялістаў і як у далейшым будзе ажыццяўляцца іх замацаванне. "Гэта датычыцца ўрада і вас (Міністэрства адукацыі. - Заўвага БЕЛТА) перш за ўсё. Так, сёння адораная моладзь - гэта ўнікальнае стварэнне ў любой дзяржаве. І мы павінны ўсяляк абараняць і, скажу адкрыта, утрымліваць гэту моладзь у сябе. Гэта задача нумар адзін. Адступленняў ніякіх быць не можа", - падкрэсліў Аляксандр Лукашэнка.
"Давайце абмяркуем, ці будзем мы ствараць новы цэнтр. Калі будзем, то, зразумела, туды будуць сцягнуты самыя лепшыя, самыя прагрэсіўныя і таленавітыя людзі для навучання і выкладання. Гэта трэба разумець. І другое - адтуль павінен выйсці гатовы "тавар". А значыць, туды павінны прыйсці моцныя спецыялісты", - сказаў беларускі лідар.
Андрэй Іванец у сваім дакладзе канстатаваў, што ў свеце ідзе барацьба за таленавітую моладзь і Беларусь не выключэнне. Штогод беларускія школьнікі заваёўваюць больш за 50 медалёў на міжнародных алімпіядах, звыш 200 становяцца пераможцамі рэспубліканскіх алімпіяд. Больш як 100 выпускнікоў Нацыянальнага дзіцячага тэхнапарка паступаюць у ВНУ без экзаменаў. "Безумоўна, гэта наш залаты інтэлектуальны фонд. І такая моладзь па праву хоча атрымаць вышэйшую адукацыю сусветнага ўзроўню", - сказаў міністр.
Ён лічыць, што ў класічна арганізаваных ВНУ ў поўнай меры гэта складана забяспечыць, а менавіта: прыцягнуць у адно месца самых адораных навучэнцаў, сапраўды прызнаных спецыялістаў у сваіх напрамках і стварыць унікальнае адукацыйнае асяроддзе.-0-
Падпісвайцеся на нас у
