25 чэрвеня, Мінск /Кар. БЕЛТА/. Прэзідэнт Беларусі Аляксандр Лукашэнка 25 чэрвеня падпісаў указ нумар 240 "Аб адміністрацыйных працэдурах, якія ажыццяўляюцца ў адносінах да суб'ектаў гаспадарання". Аб гэтым БЕЛТА паведамілі ў прэс-службе беларускага лідара.
Гэты дакумент накіраваны на ўдасканаленне парадку ажыццяўлення адміністрацыйных працэдур у адносінах да суб'ектаў гаспадарання. Указам замацавана трохузроўневая сістэма рэгулявання адміністрацыйных працэдур.
На ўзроўні кіраўніка дзяржавы вызначаны асновы рэгулявання адміністрацыйных працэдур для бізнесу: замацаваны падыходы і прынцыпы, на якіх грунтуюцца прававое рэгуляванне і правапрымяняльная практыка ажыццяўлення адміністрацыйных працэдур (у тым ліку лічбавізацыя адміністрацыйных працэдур, іх максімальная кансалідацыя ў службе "адно акно", суразмернасць агульнай адміністрацыйнай нагрузкі на суб'екты гаспадарання рэальна існуючым патрэбнасцям рэгулявання эканамічнай дзейнасці); закладзены механізмы аптымізацыі і лічбавай трансфармацыі працэсаў узаемадзеяння органаў улады паміж сабой і з суб'ектамі гаспадарання.
Урадам зацвярджаецца адзіны пералік адміністрацыйных працэдур, якія ажыццяўляюцца ў адносінах да суб'ектаў гаспадарання, а таксама ажыццяўляецца практычная рэалізацыя вызначаных кіраўніком дзяржавы прынцыпаў і падыходаў. Пры зацвярджэнні адзінага пераліку ўрадам па кожнай адміністрацыйнай працэдуры будуць вызначаны: орган-рэгулятар, у абавязкі якога будзе ўваходзіць распрацоўка рэгламентаў адміністрацыйных працэдур; упаўнаважаны орган, які непасрэдна ажыццяўляе адміністрацыйныя працэдуры.
Органамі-рэгулятарамі будзе ажыццяўляцца распрацоўка і зацвярджэнне рэгламентаў - пакрокавых алгарытмаў ажыццяўлення адміністрацыйных працэдур, падрыхтоўка прапаноў па ўдасканаленні парадку іх ажыццяўлення і вырашэнні іншых пытанняў па зніжэнні агульнай адміністрацыйнай нагрузкі на суб'екты гаспадарання.
Важнейшай навацыяй указа для забеспячэння даступнасці інфармацыі аб адміністрацыйных працэдурах для суб'ектаў гаспадарання з'яўляецца стварэнне электроннага рэестра адміністрацыйных працэдур, у якім у кампактнай і даступнай форме будзе сканцэнтравана актуальная інфармацыя аб тым, да каго, куды і ў які час звяртацца за ажыццяўленнем адміністрацыйнай працэдуры, якія дакументы рыхтаваць, калі чакаць прыняцця рашэння.
Акрамя таго, указам даручана ўраду да 1 студзеня 2024 года правесці сістэмную работу па скарачэнні і спрашчэнні адміністрацыйных працэдур.-0-
