14 кастрычніка, Астана /Кар. БЕЛТА/. У сталіцы Казахстана Астане стартавала пасяджэнне Савета кіраўнікоў дзяржаў СНД. На адкрыцці форуму калег прывітаў гаспадар саміту Прэзідэнт Казахстана Касым-Жамарт Такаеў, перадае карэспандэнт БЕЛТА.
Як вядома, у бягучым годзе Казахстан старшынствуе ў СНД. "Сёння на разгляд Савета кіраўнікоў дзяржаў прадстаўлены важныя пытанні, якія датычацца гуманітарнага партнёрства, забеспячэння бяспекі і іншых аспектаў нашага супрацоўніцтва", - сказаў Прэзідэнт Казахстана.
Для інфармавання аб праекце парадку дня і рэгламенту работы слова было прадастаўлена старшыні Выканкама СНД Сяргею Лебедзеву.
На гэтым адкрытая для прэсы частка сустрэчы завяршылася. Лідары краін прадоўжылі размову ў вузкім складзе за закрытымі дзвярамі.
Чакаецца, што яны абмяняюцца меркаваннямі па актуальных праблемах Садружнасці Незалежных Дзяржаў. Будуць разгледжаны і некаторыя арганізацыйныя пытанні. Так, на саміце плануецца прыняць рашэнне аб перадачы старшынства ў СНД у 2023 годзе Кыргызстану і правядзенні чарговага пасяджэння Савета кіраўнікоў дзяржаў у Бішкеку.
Затым, ужо ў шырокім складзе, удзельнікі саміту таксама абмяркуюць шэраг пытанняў. Па выніках саміту чакаецца падпісанне шэрага пагадненняў і прыняцце рашэнняў аб развіцці супрацоўніцтва ў розных сферах, уключаючы тэму барацьбы з карупцыяй, тэрарызмам і экстрэмізмам, пытанні эканомікі, гуманітарнага і культурнага супрацоўніцтва.-0-
