Сцяг Аўторак, 25 чэрвеня 2024
Усе навіны
Усе навіны
Прэзідэнт
09 лютага 2023, 16:32

"Цяпер СМІ - гэта поле барацьбы". Лукашэнка выказаўся аб падрыхтоўцы журналісцкіх кадраў

9 лютага, Мінск /Кар. БЕЛТА/. Сродкі масавай інфармацыі сёння сталі полем барацьбы, і без надзейных і разумных байцоў у гэтай вайне не перамагчы. Аб гэтым Прэзідэнт Беларусі Аляксандр Лукашэнка заявіў на сустрэчы з навуковымі і навукова-педагагічнымі работнікамі, перадае карэспандэнт БЕЛТА.

На сустрэчы былі закрануты ў тым ліку і пытанні развіцця айчыннай журналістыкі, падрыхтоўкі кадраў для гэтай сферы. Асаблівая ўвага была ўдзелена рабоце факультэта журналістыкі БДУ.

"Мы там паспрабавалі ўсё ж такі журналістыку нашу павярнуць тварам да жыцця. Журналістаў трэба трымаць каля жыцця, каб яны бачылі, што будзе заўтра, паслязаўтра і гэтак далей. Вельмі важна, каб гэта быў працэс з двухбаковым рухам", - падкрэсліў Аляксандр Лукашэнка.

Прэзідэнт растлумачыў, што кіраўнікі сродкаў масавай інфармацыі перш за ўсё павінны быць зацікаўлены ў падрыхтоўцы прафесійных кадраў, а значыць, ім трэба курыраваць гэты працэс. Для гэтага раней было прынята рашэнне аб стварэнні спецыяльнага савета ў БДУ, куды ўвайшлі б кіраўнікі рэспубліканскіх СМІ.

"Каб яны назіралі і ўжо бачылі журналістаў вашых і выкладчыкаў, даводзілі да іх тыя патрэбнасці, у якіх мы маем патрэбу ў сферы журналістыкі, і дапамагалі. Таму гэты сімбіёз было даручана стварыць. З імі трэба працаваць, каб яны былі перш за ўсё патрыётамі нашай краіны, - адзначыў кіраўнік дзяржавы. - Дзякуй богу, што Амерыка паказала, што такое дэмакратыя і свабода. І правы чалавека. Крок ступіў не туды - застрэлілі гэту дзяўчыну ў прамым эфіры (размова пра забойства Эшлі Бэбіт у студзені 2021 года ў час пратэстаў у ЗША. - Заўвага БЕЛТА). Патрыётка, якая на трох ці чатырох войнах была. Ваявала за інтарэсы Амерыкі. Вось вам і правы чалавека, і дэмакратыя. Яны мне сёння ўжо аб гэтым не гавораць. Ужо пра дыктатуру не гавораць. Як толькі рот раскрыюць - я ім канкрэтныя прыклады. Таму нам у гэтым плане трэба працаваць".

Аляксандр Лукашэнка сказаў, што спецыяльна закрануў тэму падрыхтоўкі кадраў. Паколькі ў рабоце вучоных важна бачыць не толькі іх распрацоўкі, але і саміх людзей. "Асабліва журналістаў. Чаму асаблівую ўвагу я на гэта звяртаю? Таму што так здарылася, што СМІ і журналісты апынуліся цяпер на пярэднім краі гэтай барацьбы. Цяпер сродкі масавай інфармацыі - гэта поле барацьбы, пачынаючы ад інтэрнэту і заканчваючы традыцыйнымі сродкамі масавай інфармацыі. І без байцоў, надзейных, здольных, галавастых, разумных, мы ў гэтай вайне не пераможам", - падагульніў Прэзідэнт.

Загадчыца кафедры факультэта журналістыкі БДУ доктар філалагічных навук Святлана Харытонава выказалася аб цяперашнім стане беларускай журналістыкі праз прызму развіцця дзіцячай прэсы. "У сучаснай журналістыцы, хацелася б падкрэсліць асабліва, назіраецца тэндэнцыя несістэмнага і непаслядоўнага развіцця дзіцячых выданняў, што даследавалі мы. Праяўляецца тэндэнцыя распаўсюджвання забаўляльнага і інакультурнага кантэнту, разам з якім у дзіцячую свядомасць пранікаюць не характэрныя для айчынных выхаваўчых традыцый маральныя ўстаноўкі. Пры гэтым нівеліруюцца маштабы асвятлення інтэлектуальнага і духоўнага патэнцыялу дзяцей", - адзначыла Святлана Харытонава.

Вучоная ступень доктара філалагічных навук прысуджана ёй за навукова-тэарэтычнае абгрунтаванне канцэпцыі сістэмаўтварэння дзіцячых сродкаў масавай інфармацыі, фарміравання іх візуальна-семантычнай структуры і рэалізацыі выхаваўчага патэнцыялу, што садзейнічае развіццю журналістыкі і медыякамунікацыі для дзяцей.-0-

Падпісвайцеся на нас у
Twitter
Топ-навіны
Свежыя навіны Беларусі