2 красавіка, Мінск /Кар. БЕЛТА/. Прэзідэнт Беларусі Аляксандр Лукашэнка даў парады ігракам каманды "Дынама-Мінск" перад чарговым этапам у плэй-оф КХЛ, перадае карэспандэнт БЕЛТА.
Што датычыцца гульні ў матчах першага раўнда плэй-оф, у ходзе якога хакеісты "Дынама-Мінск" адолелі аднаклубнікаў з Масквы, Прэзідэнт сказаў: "Усё было прыгожа і добра".
Але на будучае Аляксандр Лукашэнка даў такую параду: "Трэба прагматычна гуляць. Таму што я ведаю, што гэта (прагматычны падыход. - Заўвага БЕЛТА) не ваша гульня. Вы - людзі атакуючыя: наперад, наперад, наперад, а потым праваліліся... Ну, гэта плэй-оф. Недзе трэба адкінуць, недзе трэба адскочыць, у абароне пагуляць і гэтак далей. Не прайграваць укідванне. Каб не 75 працэнтаў было, а 100 працэнтаў. Таму што кожны элемент важны".
"Хлопцы, мы за вас вельмі балеем. Што скажаце, усё будзем рабіць. І не толькі ў час вашай гульні, але і пасля яе. Застаняцеся ў Мінску - падумаем, чым вам дапамагчы. Поле травы я вам падрыхтаваў касіць. Таму што гэта ж рухі тыя ж самыя. Дровы сячы будзем. Я гатовы з вамі рыхтавацца ў міжсезонцы і выканаць той аб'ём работ, якія вы будзеце выконваць. З маленькай папраўкай. Дзякуй вам, хлопцы", - сказаў Прэзідэнт.
Гаворачы аб папярэдніх гульнях "Дынама-Мінск" у КХЛ, кіраўнік дзяржавы таксама ацаніў гульню варатара Зака Фукале: "Зак малайчына, вельмі нядрэнна гуляў. Вядома, час ужо яму ў далёкі правы вугал не прапускаць. Але добра, што не прапускае знізу".
"Малайцы, абаронцы вельмі добра (спрацавалі. - Заўвага БЕЛТА), нападаючыя. А тое, што Віталь такі пас аддаў нашаму "Ак Барсаўцу" (гаворка пра перадачу Віталя Пінчука ў вырашальнай гульні з "Дынама-Масква" ў адрас Станіслава Галіева, які раней выступаў за "Ак Барс". - Заўвага БЕЛТА), - гэта наогул цуд. Малайцы. Такі кідок вельмі правільны", - ацаніў гульню Аляксандр Лукашэнка.
Капітан каманды Андрэй Стась ад усіх ігракоў падзякаваў Аляксандру Лукашэнку за падтрымку і запрасіў на першы матч з "Ак Барсам" у Мінску. "Трэба, каб вы прыйшлі. Абавязкова", - сказаў ён.
"Ды я гатовы тут начаваць, толькі б выйгралі, - заявіў Аляксандр Лукашэнка. - Згуляйце дастойна, каб народ не расчараваўся ў вас".
Аляксандр Лукашэнка 24 сакавіка ў "Мінск-Арэне" наведаў першы матч "Дынама-Мінск" у плэй-оф Кантынентальнай хакейнай лігі цяперашняга сезона. З трыбуны ён назіраў за паядынкам "Дынама-Мінск" і маскоўскага "Дынама". У серыі гульняў з маскоўскімі аднаклубнікамі мінскія "зубры" паказалі выдатны рэзультат, выйграўшы ў чатырох матчах запар і забяспечыўшы сабе выхад у наступны раўнд плэй-оф.
У 1/4 фіналу "Дынама-Мінск" згуляе з казанскім "Ак Барсам". Серыя да чатырох перамог стартуе на "Мінск-Арэне" 9 красавіка, другі матч адбудзецца там жа 11 красавіка. Далей сапернікі пераедуць у Казань, дзе згуляюць 13 і 15 красавіка. Пры неабходнасці матчы з пятага па сёмы пройдуць 17, 19 і 21 красавіка. Раней "Дынама" і "Ак Барс" у плэй-оф не сустракаліся.-0-
Падпісвайцеся на нас у
